Ölkədə kütləvi zəhərlənmələrin sayı artıb. Xüsusilə bölgələrdə tez-tez qida zəhərlənmələri baş verir. Belə ki, ötən gün Şəkidə toyda kütləvi zəhərlənmə olub. Toyda iştirak edən 21 nəfər toy mərasimindən sonra Şəki Rayon Mərkəzi Xəstəxanasına müraciət ediblər.
Oxşar hadisə İsmayıllı rayonunda da baş verib. Hadisə rayonun Qəzili kəndində qeydə alınıb.
Kənd sakini Hüseynov Müşviq Sabəli oğlunun həyətində övladı üçün keçirdiyi kiçik toy məclisində qonaqların halı pisləşib. Onlar təcili İsmayıllı Rayon Mərkəzi Xəstəxanasına çatdırılıb. Xəstəxanadan verilən məlumata görə, zəhərlənmə ilə bağlı 30 nəfər müraciət edib. İlkin tibbi yardımdan sonra xəstələr ambulator müayinə üçün evə buraxılıb. Xəstəxanada ikisi uşaq olmaqla, dörd nəfər maüalicə alır.
Xüsusilə yay aylarında qida zəhərlənmələrinə daha çox rast gəlirik. Səbəb isə qidaların düzgün şəraitdə saxlanılmaması və yaxud vaxtı keçmiş məhsulların qəbul edilməsi olur. Bəs, bu prosesə nəzarət necə və hansı qurum tərəfindən olmalıdır ki, neqativ hallar baş verməsin?
Məsələ ilə bağlı Sherg.az-a danışan “Azad İstehlakçılar” İctimai Birliyinin sədri Eyyub Hüseynov qeyd etdi ki, sözügedən məsələyə cavabdeh olan qurum Qida Təhlükəsizliyi Agentliyidir.
Ekspert bildirib ki, QTA-nın əsasnaməsinə görə, qida sektorunda iştirak edən, qidanı saxlayan, daşıyan və paylayan şirkətlər agentlikdə reyestrə daxil olmalıdır:
“Ümumiyyətlə, qida zəncirində iştirak edən bütün subyektlər agentliyin nəzarətində qalmalıdır. Qidanın təhlükəli olması üçün onun bir zəncirinin zəifləməsi kifayət edir. Yəni, qida yalnız yeyiləndə yox, saxlanılanda və daşınanda da zəhərli ola bilər. Əminəm ki, şadlıq evləri QTA-nın reyestrinə daxildir. Təəssüf ki, agentlik həm sertifikat verir, həm də keyfiyyətə nəzarət edir. Düşürəm ki, sertifikat verən orqanla nəzarət edən orqan ayrı olmalıdır. Bu cür zəhərlənmələr əvvələr də olurdu. Lakin Səhiyyə Nazirliyi həm sertikifat verib, həm də nəzarət etdiyi üçün informasiyaları gizlədirdi. Gərək QTA hər bir şadlıq sarayında və restoranlarda nəzarəti həyata keçirsin. Təəssüf ki, agentlik məhdud resursları ilə bunu etməyə qadir deyil. Ona görə QTA ictimaiyyətlə bərabər iş aparmalıdır.
Dəfələrlə, ictimai köməklik göstərmək üçün agentliyə məlumat vermişik . Lakin QTA ictimaiyyətlə əlaqəli iş qurmağa hazır deyil. Ona görə də zəhərlənmə ilə nəticələnən hadisələr baş verir. Bu, normal hal deyil. Əhali çox diqqətli olmalı, vaxtı keçmiş qidaları qəbul etməməlidir”.
