Zaur Məmmədov: "Erməni tərəfi agah olsun ki, bu dəfə Nikol Paşinyan Qarabağı yox, Ermənistanı uduzacaq"
Rusiyanın Qarabağdakı sülhməramlı kontingentinin komandanlığı bölgədəki ermənilərin Azərbaycan-Ermənistan sərhədinə “aksiyası”nı müşayiət etməkdən imtina edib. Sülhməramlıların komandanlığı bildirib ki, 10 noyabr 2020-ci il tarixli üçtərəfli bəyanatın müddəalarına uyğun olaraq, Rusiya sülhməramlı kontingentinin avtoyürüş karvanlarında avtomobillərin müşayiət olunması, eləcə də müxtəlif aksiyaların və mitinqlərin təhlükəsizliyinin təmin edilməsi nəzərdə tutulmur.
Bakı Politoloqlar Klubunun sədri, politoloq Zaur Məmmədov deyib ki, Ermənistanın və Qarabağdakı separatçıların təxribat məqsədilə hərəkət etdikləri məlumdur. Politoloqun sözlərinə görə, indiki məqamda separatçı ünsürlərə açıq dəstək vermək aşkar şəkildə tərəf seçmək anlamına gəlir:
"Yaxın günlərdə Türkiyə Prezidenti R.T.Ərdoğanla Rusiya rəhbəri V.Putin arasında görüş gözlənilir. Çox güman ki, liderlərin görüşündə Qarabağ və Laçın yolu ilə bağlı danışıqlar da baş tutacaq. Laçın yolundakı nəzarət-buraxılış məntəqəsi ilə bağlı kimin nə tələb etməsindən asılı olmayaraq, bu məsələ bitmiş sayılır. Heç bir güzəştdən söhbət gedə bilməz. 2014-16-cı illərdə Rusiya Donetsk istiqamətində humanitar konvoylar göndərəndə Qərb ölkələri buna qarşı çıxmış və digər alternativ yollar təklif etmişdilər. Ancaq indi Azərbaycanla bağlı fərqli prosesə şahidlik edirik. Azərbaycan haqlı və prinsipial mövqeyini ortaya qoyub, Ağdam-Xankəndi yolu ilə bağlı təklifini irəli sürüb. Ermənistan birtərəfli qaydada, yəni Azərbaycanla razılaşdırılmadan bizim ərazimizə "humanitar yardım" adı altında yük maşınları göndərə bilməz. Həmin TIR-lar nə daşıyır?".
Z.Məmmədov bəyan edib ki, əgər Ermənistana bir dəfə güzəşt edilsə, istəkləri artacaq: "Qarabağdakı separatçıların məqsədi "yürüş" adı ilə şou təşkil etməkdir. Bu şouların yeganə məqsədi ermənilərin reinteqrasiyasına mane olmaq, sülh danışıqlarını pozmaq, vaxtı uzatmaqdır. Amma erməni tərəfi agah olsun ki, bu dəfə Nikol Paşinyan Qarabağı yox, Ermənistanı uduzacaq".
