Taliban hökumətinin lideri Heybətullah Axundzadə əfqanların qeyri-müsəlmanlarla dostluq etmələrinin qarşısını almaq üçün islam normalarının icrasına nəzarət edən imamlara göstəriş verən qanun imzalayıb.
Axar.az xəbər verir ki, bu barədə Taliban hökumətinin Ədliyyə Nazirliyindən bildirilib.
Qanunun “Kafirlərlə dostluq etmək qadağandır” adlı 112-ci maddəsində Quranın “Maidə” surəsindən sitat gətirilib: “Ey iman gətirənlər, yəhudi və xristianlarla dostluq etməyin! Onlar bir-birlərinin dostlarıdır. Sizdən kim onlarla dostluq edərsə, o da onlardandır. Şübhəsiz ki, Allah zalım bir qövmü doğru yola yönəltməz”.
Taliban Ədliyyə Nazirliyinin sözçüsü Bərəkətullah Rəsuli bildirib ki, yeni qanun həm də imamları zina, qumar, radiodan sui-istifadə, narkotik istifadəsi, hicabdan imtina, saqqal qırxmaq, şəriət qanunlarına zidd saç kəsdirmə əməllərinin qarşısını almağa məcbur edir. Cinayət törədənlərə xəbərdarlıqla yanaşı, əmlakdan məhrumetmə, bir saatdan üç günə qədər həbs cəzası verilə bilər.
