Yeni Qvineyanın Nyu Ireland bölgəsində beş gün ərzində 3 mindən çox balıq və digər dəniz canlısı müəmmalı şəkildə ölüb. Ölü balıqlarda rəng dəyişikliyi, şişmiş gözlər və yaşıl rəngli ət kimi anormalliklər müşahidə olunub.
Sherg.az xəbər verir ki, bölgədə yaşayan ən az 750 nəfər balıq yedikdən və ya dəniz suyuna təmas etdikdən sonra sinə ağrısı, öskürək və dəri problemləri kimi sağlamlıq narahatlıqları yaşayıb.
Papua Yeni Qvineya Balıqçılıq Naziri Jelta Wong əhaliyə balıq yeməməyi tövsiyə edib. Səhiyyə və ekoloji ekspertlər kimyəvi çirklənmə ehtimalını araşdırır, lakin səbəb hələ dəqiq müəyyən edilməyib.
Balıqçılıq ərazilərdə əsas gəlir mənbəyi olduğundan, ölümlər və qadağa yerli əhali üçün həm iqtisadi, həm də qida böhranı yaradıb. Saha tədqiqatları zamanı “qırmızı gelgit” hadisəsi də müşahidə olunub; ekspertlər bunu toksik alg partlaması ilə əlaqələndirirlər.
