Türkiyənin Trabzon şəhərinin Çaykara rayonunda, yaşadığı evdə sobadan sızan karbonmonoksit qazından zəhərlənən imam Fatih Göktaş (28) həyatını itirib.
Sherg.az hadisənin təfərrüatını təqdim edir:
Çaykara rayonunun Köknar məhəlləsində yerləşən Mərkəz məscidində imam olaraq çalışan Fatih Göktaş səhər namazına gəlmədiyi üçün məhəllə sakinləri narahat olub və vəziyyəti 112 Təcili Çağrı Mərkəzinə bildiriblər. Məlumat əsasında Göktaşın tək yaşadığı evə jandarma və təcili tibbi yardım qrupları göndərilib.
Əraziyə çatan qruplar evə daxil olduqda, Fatih Göktaşı hərəkətsiz vəziyyətdə tapıblar. Aparılan araşdırmalar nəticəsində onun sobadan sızan karbonmonoksit qazından zəhərlənərək vəfat etdiyi müəyyən olunub.
Fatih Göktaşın nəşi, Məhkəmə-Tibbi Ekspertiza İnstitutunda aparılan otopsiyadan sonra vətəni Konya şəhərinə göndərilib.
