Norveçin "Bryne FK" klubu, 22 ildən sonra yüksəldiyi Premyer Liqada (Eliteserien) mövsümün ilk qələbəsini qazandıqdan sonra oyunun ən yaxşı futbolçusuna quzu hədiyyə edib.
Sherg.az xəbər verir ki, Norveç Premyer Liqa komandalarından "Bryne", üçüncü həftə qarşılaşmasında "Haugesund" klubunu 3:1 hesabı ilə məğlub edib.
Bu, "Bryne" klubunun 22 ildən sonra yüksəldiyi Premyer liqada qazandığı ilk qələbə olub.
Komandasının ilk qolunu vuran və oyunun ən yaxşı futbolçusu seçilən norveçli futbolçu Axel Kryger, qeyri-adi bir şəkildə — quzu ilə mükafatlandırılıb.
ƏVVƏLLƏR YUMURTA VƏ SÜD HƏDİYYƏ EDİLMİŞDİ
Yerli kənd təsərrüfatı və heyvandarlıqla olan güclü əlaqələri ilə tanınan "Bryne FK", daha öncə də oyunçusuna yumurta və süd hədiyyə etmişdi.
Bundan əlavə, azarkeşlərə klubun kənd təsərrüfatı ilə bağlılığı səbəbilə VIP bilet xidməti olaraq stadionun kənarından traktor kepçəsi üzərində oyunları izləmək imkanı da verilir.
