Rusiya ordusu Donbasda kamikadze taktikası ilə, yavaş da olsa, irəliləməyə çalışır.
Teleqraf xəbər verir ki, bu barədə "The Guardian" nəşrinin reportajında bildirilir.
Regionda müdafiə mövqelərində dayanan Ukrayna hərbçiləri bildirirlər ki, rus qoşunları “hiyləgər və insan itkisi baxımından baha başa gələn” bir müharibə aparır:
“Bəzən bir neçə rus əsgəri kəndin yaxınlığında bayraq qaldırır. Bir neçə dəqiqə sonra biz onları məhv edirik. Düşmən şüurlu şəkildə hücum dəstələrini qurban verir ki, guya irəliləyiş əldə etdiklərini göstərsin. Onlar sadəcə görüntü naminə çoxsaylı itkilər verirlər”.
Hərbçilər Rusiyanın hücum planını da belə təsvir edir: əvvəlcə tanklar irəliləyir, arxasınca isə zirehli texnika və piyadalarla dolu yük maşınları gəlir. Məqsəd nəyin bahasına olursa-olsun müdafiə xəttini yarmaqdır.
31-ci mexanikləşdirilmiş briqadanın kapitanı Viktor Danyşçuk isə etiraf edir ki, Ukrayna ordusunun texniki imkanları məhduddur:
“Bizim yeganə yolumuz döyüşü davam etdirməkdir. Biz torpağımızı müdafiə edirik”.
Qeyd edək ki, 54-cü ayrı mexanikləşdirilmiş briqada və 81-ci aeromobil briqadası hazırda 11-ci korpus tərkibində Severodonetsk istiqamətində rusların genişmiqyaslı hücumunun qarşısını alıb.
Rusiya ordusu Severodonetsk istiqamətində vaxtaşırı böyük hücumlar təşkil edir. May–iyun aylarında qonşu Beloxorivka kəndinin itirilməsindən sonra bu istiqamətdə təzyiq daha da artıb.
Severodonetskə nəzarətin saxlanılması isə Rusiyanın Slovyansk istiqamətində irəliləyişini əngəlləyir.
