ABŞ-nin prezident administrasiyasının tətbiq etdiyi yeni tarif siyasəti idxal şirkətlərinin illik xərclərini 202 milyard dollar artıracaq.
Teleqraf "Bloomberg"ə istinadən xəbər verir ki, xüsusilə ABŞ-nin kiçik biznes şirkətləri yeni tariflər səbəbindən əhəmiyyətli maliyyə xərcləri və bürokratik çətinliklərlə üzləşəcəklər.
Nəşrin yazdığına görə, son illər ölkədə iş yerlərinin yarıdan çoxunu təmin edən kiçik şirkətlər rüsumların idxal qiymətlərini artırması nəticəsində yaranan əlavə xərclərin öhdəsindən gəlməkdə çətinlik çəkirlər.
ABŞ Ticarət Palatasının avqustun əvvəlində açıqladığı məlumatlara görə, Trump administrasiyasının tətbiq etdiyi tariflər ABŞ-nin kiçik idxal şirkətlərinin xərclərini 202 milyard dollar artıracaq.
O da qeyd edilir ki, ölkədə 236 mindən çox belə firma var.
Aprelin 2-də Tramp 185 ölkə və ərazidən gələn məhsullara rüsumlar tətbiq etdiyini açıqlayıb. Avqustun 1-də o, 60-dan çox ölkə və Avropa İttifaqına 15%-dən 41%-ə qədər tariflər tətbiq edən sərəncam imzalayıb. Sənəd avqustun 7-də qüvvəyə minib.
