“Qərbin Rusiyaya qarşı sanksiyaları dolların qlobal iqtisadiyyatdakı roluna mənfi təsir göstərə bilər”.
“Report”un məlumatına görə, bunu ABŞ Federal Ehtiyatlar Sisteminin (FED) Rəhbər Komitəsinin üzvü Kristofer Uoller “Amerika dollarının qlobal iqtisadiyyatda rolu” mövzusunda keçirilən konfransda deyib.
Onun sözlərinə görə, dolların beynəlxalq istifadəsi üçün çətinliklərdən biri onun geoiqtisadiyyatdan birbaşa asılılığı ilə bağlıdır.
“Artan geosiyasi gərginlik, Rusiyaya qarşı sanksiyalar, Çinin yuanın istifadəsini genişləndirmək cəhdləri və iqtisadi parçalanma dolların ilk növbədə aktivlər anbarı kimi beynəlxalq istifadəsinə və onun rəsmi valyuta ehtiyatlarında istifadəsinə təsir göstərə bilər”.
O qeyd edib ki, eyni faktorlar dolların beynəlxalq ödənişlər vasitəsi kimi roluna təsir edə bilər. Eyni zamanda, dollardan qlobal ehtiyat valyuta kimi mümkün imtina ilə bağlı proqnozlar hələ də özünü doğrultmayıb:
“Bir sıra göstəricilərə görə dollar ən çox istifadə olunan valyuta olaraq qalır, o cümlədən aktivlərin saxlanması və ödəniş vasitəsi kimi”.
İqtisadçı-ekspert Xalid Kərimli isə “Sherg.az”a bildirib ki, yaxın 10 ildə ABŞ dollarının dominantlığını itirəcəyini gözləmir:
“Proseslərin daha çox Amerikanın dominantlığınının davam etməsi istiqamətində baş verdiyini güman edirəm. Məsələ ondan ibarətdir ki, Rusiyanın xarici valyutada olan aktivlərinə Amerika və Avropa həbs qoyub. Ancaq bu aktivləri müsadirə etmirlər. Bütün dövlətlər yığımlarının 60 faizindən çoxunu Amerika dolları ilə edir. Amerika dollarının ödəmələrdə çəkisi bəzən 70-80 faizə qədər çıxır. Əgər ABŞ bu cür valyutalara sanksiyalarda istifadənin ağını çıxarsa, digər ölkələr fikirləşə bilərlər ki, Rusiyaya qarşı bu hərəkəti edən dövlət bizə də edəər. Rusiya iqtisadiyyatı dünya iqtisadiyyatında rol almağa davam edəcək. Rubl Rusiya iqtisadiyyatına bağlı olduğuna görə və dünya iqtisadiyyatı üçün əhəmiyyət kəsb etdiyi səbəbiylə özünü qoruyacaq. Dolların ucuzlaşması Azərbaycan üçün infliyasiyanın artması və iqtisadiyyatın ucuzlaşması deməkdir.”
