Ukraynada 3 mindən çox məhkum müharibədə iştirak üçün müraciət edib
Məhkumların müharibədə iştirakına icazə verən sənədin qəbulundan sonra üç min nəfərdən çox məhkum müharibədə iştirak etmək üçün şərti azadlığa buraxılması ilə bağlı müraciət edib.
“Pravda”dan verilən məlumata görə, bunu Ukraynanın ədliyyə nazirinin müavini Olena Vısotska deyib.
O bildirib ki, əvvəlki sorğularda bu göstərici 4,5 min nəfər olub. Nazir müavininin sözlərinə görə, ərizə-anketi dolduranların heç də hamısı orduya cəlb edilməyəcək:
“Əvvəlcə onlar müayinələrdən keçiriləcək. Əgər yoluxucu və təhlükəli xəstəliklər aşkarlansa belə, şəxslər səfərbərlikdən kənarda qalacaq. Bizə məlum olan rəqəmlər nisbidir, çünki müharibədə iştirak etmək istəyən məhkumların sayı daha çox ola bilər. Hazırda haqqında bəhs etdiyim bütün şəxslər müvafiq müayinələrdən keçir. Bundan sonra isə onlar məhkəmənin qərarı ilə şərti olaraq azadlığa buraxılır. Bu qəbildən olan şəxslər müqavilə bağlamaqdan imtina edirsə, onları 10 ilədək həbs cəzası gözləyir”.
Qeyd edək ki, Rusiya-Ukrayna müharibəsi hələ də davam edir. Hazırda Rusiya ordusu Ukraynanın Xarkov vilayətində çoxlu sayda yaşayış məntəqələrini ələ keçirməyə davam edir.
Politoloq Elçin Xalidbəyli "Sherg.az"a açıqlamasında bildirib ki, Ukrayna həm hərbi texnika, həm də canlı qüvvə azlığı ilə üzləşib:
"Ukrayna cəbhə bölgəsində həddindən artıq canlı qüvvə itirib. Digər tərəfdən də Ukrayna əhalisinin əhəmiyyətli bir hissəsi Avropaya üz tutub və bunların böyük əksəriyyəti orduya cəlb olunmalı şəxslərdir. Rəsmi Kiyev sözügedən məsələlərdən ötrü məhbusları orduya çağırmaq məcburiyyətində qalıb. Lakin bunun müharibəyə ciddi təsir göstərəcəyi inandırıcı görünmür. Çünki Ukrayna ordusunun daha geniş hərbi mobilizasiyaya ehtiyacı var. Hazırda Qərb Zelenskiyə vəd etdiyi hərbi texnikanı təhvil verməyib. Bu səbəbdən Ukrayna ordusu Rusiya ordusunun hücumlarına müqavimət göstərməkdə çətinlik çəkir".
Analitik əlavə edib ki, proseslər belə davam edərsə, müharibə ilin sonuna qədər bitə bilər:
"Hazırda Qərbdə bir sıra siyasi dairələr Ukraynanı sülh müqaviləsini imzalamağa hazırlayır".
