“Hərbi vəziyyət elan olunub. Deməli, hərbi vəziyyətin qaydalarına uyğun davranmalıyıq”
“Əsgərlərimizin həyatı indi bizim üçün hər şeydən əhəmiyyətli olmalıdır”
Ermənistan silahlı qüvvələrinin 2020-ci il sentyabrın 27-dən davam edən hərbi təxribatlarına qarşı Azərbaycan Respublikası Silahlı Qüvvələrinin müvəffəqiyyətlə apardığı əks-hücum əməliyyatları nəticəsində bir neçə rayon, eləcə də strateji əhəmiyyətli ərazilər işğaldan azad edilib. Bu barədə Dövlət Təhlükəsizliyi Xidməti məlumat yayıb.
Bildirilib ki, aidiyyəti dövlət orqanlarının həyata keçirdiyi dövlət sirrinin mühafizəsi tədbirlərinə zidd olaraq və müvafiq xəbərdarlıqlara baxmayaraq, döyüş əməliyyatları aparılan ərazilərdə bir sıra şəxslər mobil telefon aparatlarının texniki imkanlarından yararlanmaqla icazəsiz videoçəkilişlər ediblər. Azərbaycan qoşunlarının strateji və əməliyyat planları, dislokasiyası və yerdəyişmələri, şəxsi heyəti, silah və hərbi texnikaları, digər döyüş təminatı, əməliyyat şəraiti barədə məlumatları əldə etməyə imkan verən müxtəlif videomateriallar yayılıb:
“Qeyd olunan videogörüntülər düşmən ordusu tərəfindən Azərbaycan Respublikasının qoşun hissələrinin qüvvə və mövqeləri barədə informasiyanın əldə edilməsi, həmçinin kəşfiyyat-təxribat fəaliyyətinin həyata keçirilməsi məqsədləri üçün istifadə olunub.
Aşkar edilmiş faktlar üzrə Dövlət Təhlükəsizliyi Xidmətində Azərbaycan Respublikası Cinayət Məcəlləsinin 284-cü (dövlət sirrini yayma) maddəsi ilə cinayət işi başlanılıb, hazırda həmin şəxslərin cinayət əməlləri ilə bağlı istintaq aparılır.
Bir daha vətəndaşlara fəal döyüş zonasından icazəsiz videoçəkilişlərin aparılmasının və yayılmasının cinayət məsuliyyətinə səbəb olduğu barədə xəbərdarlıq edilir, Azərbaycan əsgərinin həyatına təhlükə yaradan bütün davranışlardan çəkinməyə çağırırıq”.
Mətbuat Şurasının sədri Əflatun Amaşov bu barədə “Sherg.az”a fikirlərini bildirib:
“Biz indi müharibə aparırıq. Hərbi vəziyyət elan olunub. Deməli, hərbi vəziyyətin qaydalarına uyğun davranmalıyıq. Hərbi senzura tətbiq edilməli, KİV-in fəaliyyətin məhdudlaşmalar qoyulmalıdır. Təssüf ki, indi bunlara əməl olunmur.
Biz Mətbuat Şurası olaraq belə vəziyyətlərdə jurnalistlərin necə davranması lazım olduğu ilə əlaqədər dəfələrlə maarifləndirici tədbirlər, seminarlar keçirmişik.
Bu məsələdə çox diqqətli olmaq lazımdır. Çünki çəkilən görüntünü hansısa bir yaxınımıza göndərmək kifayətdir ki, düşmən hərbçilərimizin yerini müəyyənləşdirsin. Əsgərlərimizin həyatı indi bizim üçün hər şeydən əhəmiyyətli olmalıdır”.
