Ağdam gələcəkdə Qarabağın, bəlkədə elə Azərbaycanın paytaxtı olacaq
Azərbaycan Respublikasının Prezidenti İlham Əliyev və birinci xanım Mehriban Əliyeva fevralın 18-də Ağdam şəhərində 1267 mənzilli 2-ci yaşayış kompleksində aparılan tikinti işləri ilə tanış olublar.
Sherg.az xəbər verir ki, dövlət başçısına və birinci xanıma məlumat verilib ki, ümumi sahəsi 14 hektara yaxın olan yaşayış kompleksi Ağdamın mərkəzi küçəsində, şəhərin təsdiq edilmiş Baş Planına uyğun salınıb. Burada tikilən yaşayış binalarındakı mənzillərdən 114-ü birotaqlı, 464-ü ikiotaqlı, 536-sı üçotaqlı, 154-ü isə dördotaqlıdır.
Ərazisinin böyük bir hissəsi yaşıllıq zonasından ibarət olacaq kompleksdəki binaların inşasında modern memarlıq yanaşmalarından və milli naxış elementlərindən istifadə olunur. Burada idman meydançalarının, istirahət guşələrinin, velosiped dayanacaqlarının və digər zəruri infrastruktur obyektlərinin yaradılması nəzərdə tutulur.
Milli Məclisin deputatı Aqil Abbas "Sherg.az"a bildirib ki, Ağdam şəhərində Prezident İlham Əliyevin başçılığı ilə baş tutan tikinti-quruculuq işlərini yüksək qiymətləndirir:
"Ağdam 100 minlik əhaliyə malik olan çox böyük şəhərdir. Həmçinin bu şəhər gələcəkdə Qarabağın, bəlkə elə Azərbaycanın paytaxtı olacaq. Ağdam İlham Əliyevin şəhəridir. Ona görə də Prezident yeni, gözəl və Avropa üslubunda şəhər inşa edir. Digər tərəfdən köhnə Ağdamı bərpa etmək mümkün deyil. O cümlədən, hazırda dövrün, dünyanın tələblərinə uyğun yeni şəhərin qurulması daha məqsədəuyğundur. Ümumiyyətlə cənab Prezident İlham Əliyevin Ağdamdakı tikinti-quruculuq işləri ilə şəxsən özünün məşğul olması, bura tez-tez səfər etməsi ürəkaçandır. Həmçinin artıq 3 kəndin inşası başa çatıb. Üstəlik, Ağdamda yol-nəqliyyat infrastrukturuna geniş diqqət yetirilməsi sayəsində tıxac problemi də olmayacaq. Ümumiyyətlə, Prezident İlham Əliyev Qarabağdakı quruculuq-abadlıq işlərinə, xüsusilə Ağdama olan sevgisindən dolayı bu bölgəyə diqqət yetirir".
