Biz bunu dəfələrlə müharibə dövründə belə döyüş əməliyyatlarının intensiv getdiyi ərazilərdə fəaliyyətimizlə sübut etmişik
Aprelin 23-də saat 22:20 radələrində Azərbaycan Ordusunun bölmələri tərəfindən guya Xəznəvar yaşayış məntəqəsi istiqamətində atəş açılması barədə Ermənistan müdafiə nazirliyinin yaydığı məlumat növbəti dezinformasiyadır və həqiqəti əks etdirmir. Bu barədə Azərbaycan Müdafiə Nazirliyi məlumat yayıb. "Bir daha bildiririk ki, Azərbaycan Ordusunun bölmələri tərəfindən mülki əhali və obyektlər istiqamətində heç vaxt atəş açılmır. Qarşı tərəf bu cür məqsədyönlü dezinformasiya və yalan məlumatlar yaymaqla öz təxribatlarını ört-basdır etməyə, eləcə də beynəlxalq ictimaiyyətdə yanlış rəy formalaşdırmağa çalışır".
Hərbi ekspert Ədalət Verdiyev Sherg.az-a söyləyib ki, ötən ayın ortalarından başlayaraq Ermənistan tərəfi intensiv şəkildə atəşkəsi pozur:
“Eyni zamanda atəşkəsin pozulmasıyla bağlı Azərbaycanın verdiyi məlumatları təkzib edirdi. İndi isə həmin təkziblərə əlavə olaraq Azərbaycanın guya mülku əhali və obyektlər istiqamətində atəş açdığını söyləyirlər. Ermənistan tərəfinin heç bir əsası olmayan və Azərbaycan Ordusunu, hərbiçilərimizi günahlandırması sağlam məmtiqdən kənardır. Ermənistan belə dezinformasiya yaymaqla müharibədən əvvəl və sonrakı dövrdə mülki əhaliyə atəş açdıqlarını ört-basdır etməklə özlərini təmizə çıxarırlar. Azərbaycan Ordusu heç vaxt mülki əhaliyə və obyektlərə qarşı atəş açmayıb. Biz bunu dəfələrlə müharibə dövründə belə döyüş əməliyyatlarının intensiv getdiyi ərazilərdə fəaliyyətimizlə sübut etmişik. Belə absurd məsələdə Ermənistanın Azərbaycanı günahlandırması onların davamlı olaraq apardığı dezinformasiya xarakterli fəaliyyətlərinin göstəricisidir. Ermənistan tərəfi belə təxribatlara davam edərsə, Azərbaycan daha təsirli addımlar ata bilər”.
