İşğaldan azad olunmuş ərazilərin iqtisadiyyatı Azərbaycanın ümumi inkişaf strategiyasının mühüm hissəsidir. 30 ilə yaxın davam edən işğal nəticəsində bu bölgələrin infrastrukturu, kənd təsərrüfatı və sənaye potensialı ciddi ziyan görmüşdü. Lakin hazırda dövlət və özəl sektorun iştirakı ilə genişmiqyaslı bərpa və yenidənqurma işləri aparılır.
Bu ərazilərdə "ağıllı şəhər" və "ağıllı kənd" konsepsiyaları tətbiq edilir, yollar, elektrik stansiyaları, suvarma sistemləri və digər strateji obyektlər tikilir. Kənd təsərrüfatının, turizmin və mədən sənayesinin inkişafı üçün böyük potensial mövcuddur. Xarici və yerli sərmayədarların cəlb olunması da iqtisadi aktivliyi artırır. Ümumilikdə, bu bölgələrin iqtisadi dirçəlişi Azərbaycanın uzunmüddətli inkişafına və regional inteqrasiyasına mühüm töhfə verəcək.
İqtisadçı ekspert Xalid Kərimli "Sherg.az"a deyib ki, işğaldan azad olunmuş ərazilərin kənd təsərrüfatı potensialı mövcuddur:
"Zəngilan, Kəlbəcər, Ağdərə regionu qızıl, gümüş, mis və s. kimi mədən ehtiyatları ilə zəngindir. Həmçinin Qarabağ bölgəsi turizmin inkişafı üçün böyük əhəmiyyətə malikdir. Əhalinin yerləşməsindən sonra isə coğrafi, qastronomik və müalicəvi turizmin də inkişafı gözlənilir. O cümlədən bərpa olunan enerji məsələsinə nəzər salsaq görərik ki, dövlət tərəfindən dağ çaylarında elektrik stansiyaları da istifadəyə verildi. Bütün bunlarla yanaşı, hökumət işğaldan azad olunmuş ərazilərdə təhlükəsizliyin təmin edilməsi və yol-nəqliyyat istiqamətində infrastruktur layihələrini həyata keçirir. Həmçinin sözügedən işlərin yekunlaşmasından sonra əhalinin gediş-gəliş məhdudiyyəti də tamamilə aradan qaldırılacaq. Digər tərəfdən Qarabağ bölgəsi ölkə ərazisində kənd təsərrüfatı məhsullarının istehsalında, xüsusilə bağçılıq, bostançılıq, əkinçiliyin genişlənməsinə şərait yaradacaq. Bu isə ixrac imkanlarının artırılması deməkdir. Mədənçilik sahəsində istismarın dayandırılması iş yerlərinin açılmasına və dövlətimizin mədənçilik sənayesinin inkişafına səbəb olacaq. Eyni zamanda işğaldan azad olunmuş ərazilərdə turizm obyektlərinin günü-gündən artması nəticə etibarilə ölkəyə turist axınını sürətləndirəcək".
