Ümumi təhsil müəssisələrinin rus bölməsi üzrə uşaqların məktəbəhazırlıq qruplarına qəbulu üçün sərbəst qaydada məktəb və müəllim seçiminə start verilib.
Bu barədə MÜTDA-dan məlumat verilib.
24 iyul 2025-ci il saat 11:00-dan etibarən Bakı və Gəncə şəhərlərindəki ümumitəhsil müəssisələrində rus bölməsi məktəbəhazırlıq qrupları üzrə prioritetlə seçim sərbəst qaydada seçimlə əvəz olunub.
Seçim prosesi mektebeqebul.edu.az portalı vasitəsilə aparılır.
Nəzərinizə çatdırırıq ki, internetə çıxış imkanı olmayan vətəndaşlar aidiyyəti üzrə:
– Alternativ qeydiyyat mərkəzlərinə
– Agentliyin və təhsili yerli idarəetmə bölmələrinin çağrı mərkəzlərinə
– ASAN xidmət mərkəzlərinə müraciət edə bilərlər.
Təhsil eksperti Elçin Əfəndi “Sherg.az”a bildirdi ki, ümumi təhsil müəssisələrində rus bölməsi üzrə uşaqların məktəbəhazırlıq qruplarına qəbuluna sərbəst seçim imkanı verildi:
“Burada həm məktəb, həm də müəllim seçimi sərbəst formada aparılır. Əvvəl prioritet nəzərdə tutulmuşdusa, artıq sərbəst seçimə qərar verildi. Əlbəttə, bu zaman yəqin ki, valideynlər seçim prosesində məktəblərin daha yüksək təhsil göstəricilərini nəzərə alacaqlar. Yaxud da hansısa bir məktəbdə, hansısa müəllimin ümumi təhsil göstəriciləri yüksək olduğunu nəzərə alıb məhz seçim aparacaqlar. Amma ümumilikdə, mən rus bölməsinin mövcudluğuna qarşıyam. Yaxşı olar ki, vətəndaşlar övladlarını Azərbaycan bölməsinə yönəltsinlər və burada təhsil alsınlar. Çünki gələcək baxımından rus bölməsində nəticələr və təhsil göstəriciləri bir o qədər də yüksək deyil. Bu baxımdan ali təhsil müəssisələrinə qəbul zamanında daha aşağı göstəriciləri qeydə alınır. Ona görə valideynlər bu amilləri nəzərə alıb seçim aparsalar məqsədəuyğun, olar. Bəhs xatirinə, hansısa real təsir fikirlərə məruz qalmaq, düşünürəm ki, doğru deyil. Həmçinin məsafə baxımından daha yaxın ərazidə olan məktəblərə üstünlük vermələri məsləhətdir”.
