Saç insanın zahiri görkəminin ən önəmli detallarından biridir. Təəssüf ki, son zamanlar saç tökülməsindən şikayyət edənlərin sayı kifayyət qədər çoxdur. Əksəriyyət bunu problem edərək depressiyaya düşür. Problemi həll etmək üçün yollar axtarırlar. Görəsən, saç dökülməsinin bu qədər geniş yayılmasının səbəbi nədir? Bunun qarşısını almaq üçün hansı vasitələrdən istifadə etmək daha effektiv olar?
Suallarımızı cavablandıran dermatoloq Nadir əhmədli ''Sherg.az"a açıqlamasında bildirib ki,saç tökülməsi müxtəlif səbəblərdən yarana bilər:
''Məsələn, mövsümi dəyişikliklər, stress, dəmir çatışmazlığı və hormon pozğunluqları səbəbindən saç tökülməsi baş verə bilər. Ancaq uzun müddətli saç tökülməsi ciddi xəstəliklərin də əlaməti ola bilər. Ona görə də diqqətli olmaq lazımdır. Sağlam bir baş dərisində orta hesabla 100 min tük var. Yuyulma və daranmaya bağlı olaraq gündə 100-150 saçın tökülməsi normal sayılır. Sağlam bir insanda saç tökülməsi 2 aya qədər davam edə bilər. Daha çox davam edərsə, həkimə müraciət etmək vacibdir''.
N. Əhmədli vurğulayıb ki, kişilərdə və qadınlarda saç tökülməsinin səbəbləri fərqlidir:
''Kişilərdə görülən saç tökülməsi, genetik olan kişi tipi və əhalinin 50%-dən çoxunda görülən hormona həssas saç tökülməsidir. Bu tip saç tökülməsi xroniki olur. Hətta, insan yaşlandıqda keçəllik yaradır və nəticədə saç əkilməsi tələb oluna bilər. Bu vəziyyətin əvvəlki illərə nisbətən daha çox olmasının səbəbləri həddindən artıq stress, balanssız qidalanma, uzun müddətli aclıq və hormonal problemlərdir''.
