“AQTA-nın gördüyü işlər dəryada damladır”
"İçki seqmentinin bərbad vəziyyətdə olduğunu 3 il bundan öncə Daxili işlər nazirliyinin baş mütəşəkkil cinayətkarlığa qarşı mübarizə idarəsi ifşa etdi”
“Onlar sübut etdilər ki, çoxsaylı brend içkilər, ən məşhur dükanlarda belə saxtadır və butulkalara doldurularaq satılır”
Azərbaycan Qida Təhlükəsizliyi Agentliyi (AQTA) “Qızıl Tac” şadlıq sarayında saxtalaşdırma yolu ilə spirtli içkilərin istehsal olunduğunu aşkarlayıb.
Belə ki, daxil olmuş məlumat əsasında Bakı şəhəri, Nəsimi rayonu, 20 yanvar küçəsi 15A ünvanında fəaliyyət göstərən Fiziki şəxs Şirinov Vüsal Telman oğluna məxsus “Qızıl Tac” şadlıq sarayında plandankənar yoxlama həyata keçirilib.
Yoxlama zamanı şənlik mərasimində istifadə üçün nəzərdə tutulmuş aşkar saxtalaşdırılma əlamətləri olan 3 ədəd 1 litrlik, 10 ədəd 0,7 litrlik “Organic Line” əmtəə nişanlı və 1 ədəd 0,7 litrlik “Mынсkъ” əmtəə nişanlı alkoqollu içkiləri aşkar edilib.
Araşdırma zamanı qanunsuz olaraq saxta spirtli içkilərin istehsalında araq butulkalarından təkrar istifadə olunmaqla, həmçinin başlıq hissələrinin kustar üsulla hazırlanaraq bərkidildiyi, eyni zamanda malların orijinalından kəskin fərqləndiyi müəyyən edilib.
Aşkar olunmuş faktla bağlı dərhal alkoqollu içkilərin realizasiyası dayandırılmış və məhsullar möhürlənərək saxlanca verilib. Müayinələrin aparılması üçün məhsullardan nümunələr götürülərək Azərbaycan Qida Təhlükəsizliyi İnstitutunun müvafiq laboratoriyalarına təqdim olunub.
Bu işlərin qarşısını almaq üçün ilk növbədə qanunvericiliyə baxmalı olduğumuzu deyən Azad İstehlakçılar Birliyinin (AİB) sədri Eyyub Hüseynov "Sherg.az"a bildirib ki, AQTA-nın gördüyü işlər dəryada damladır:
"İstehlakçıların hüquqlarının müdafiəsi haqqında qanun 1995-ci ildə qəbul olunub və ondan bu yana 7 dəfə dəyişiklik olub. Bu dəyişikliklərin hər biri isə istehlakçıların ziyanınadır. Dünyada bazardan sürətlə inkişaf edən heç bir subyekt yoxdur. Bazarlar inkişaf etsə də, istehlakçıların hüququnu qoruyan qanun, yerindəcə qalır. Biz Azərbaycan Qida Təhlükəsizliyi Agentliyinin (AQTA) əsasnaməsinə baxsaq görəcəyik ki, orada qidanın keyfiyyətindən yox, təhlükəsizliyindən söhbət gedir. Üstəlik qanunvericilikdə təhlükəli malın satılması barəsində məlumat verildikdə, hansısa dövlət orqanının onun qarşısını alması barəsində heç bir şey yoxdur. Verilən nöqsanın qarşısının alınması ən azı 5 gün çəkəcəkdir. Çünki ortada bürokrat prosedur var.Ona görədə Azad İstehlakçılar Birliyi (AİB) cəld reaksiya mexanizminin yaradılmasını təklif edir. Bunun isə AQTA-ya cəld müdaxilə səlahiyyəti vermək lazımdır.
Sədr bildirib ki, içki seqmenti çox bərbad vəziyyətdədir:
"İçki seqmentinin bərbad vəziyyətdə olduğunu 3 il bundan öncə Daxili işlər nazirliyinin baş mütəşəkkil cinayətkarlığa qarşı mübarizə idarəsi ifşa etdi. Onlar sübut etdilər ki, çoxsaylı brend içkilər, ən məşhur dükanlarda belə saxtadır və butulkalara doldurularaq satılır. Ona görə də bu kimi halların qarşısını almaq üçün baş mütəşəkkil cinayətkarlığa qarşı mübarizə idarəsinə səlahiyyətlər verilməlidir. Çünki onlar təkcə ifşa etmir, həm də cinayət işi qaldırırlar. Ümumiyyətlə, qanunları dəyişmək lazımdır. Mən keçən dəfə Ombudsman aparatı ilə görüş keçirib, bu məsələlərin həlli üçün vəsatət qaldırdım. Hazırda isə ayrı ayrı deputatlarla işlər aparılır".
