Azərbaycan Ermənistanla birbaşa, vasitəçisiz danışıqlara üstünlük verir.
Bu sözləri rusiyapərəst erməni politoloq, “Erməni layihəsi” ictimai təşkilatının rəhbəri Sergey Melkonyan erməni mediasına müsahibəsində deyib.
“Bakının birbaşa danışıqlar üçün öz səbəbi var - indi qüvvələr nisbətini öz xeyrinə dəyişib və Türkiyə hərtərəfli dəstək verir. Bu şəraitdə Ermənistana təzyiq etmək daha asandır. Vasitəçilərin olması isə Ermənistana bu təzyiqi müəyyən dərəcədə neytrallaşdırmağa və ya ən azı minimuma endirməyə imkan verərdi. Məhz buna görə də xarici aktorların vasitəçiliyi olmadan aparılan danışıqlar Ermənistan tərəfindən daha böyük güzəştlərlə doludur”, - bildirib.
Bununla bərabər, Melkonyan Bakının gələcəkdə Ermənistanda revanşist əhval-ruhiyyənin yaranmasından qorxduğunu da iddia edib:
“Azərbaycanın bu cür qorxularının real əsası var. Onlar başa düşür ki, ermənilər məğlubiyyətdən qurtulan kimi, fürsət düşən kimi öz təhlükəsizliyini təmin etmək və üzərlərində asılmış ekzistensial təhlükəni neytrallaşdırmaq üçün yenidən silaha sarılacaqlar. Təbii ki, Ermənistanda hakim qüvvə hər dəfə deyir ki, qisas almaq niyyətində deyil, lakin bu, Azərbaycan tərəfini sakitləşdirmir, bu, ona kifayət etmir. Bakı Qarabağın bütün dövlət qurumlarının tamamilə ləğv edilməsini və onun bütün simvollarının məhv edilməsini istəyir. Azərbaycan da israr edir ki, erməni müxalifəti və diasporu Qarabağ haqqında danışmağı dayandırsın və s. Ermənistan hakimiyyətinin indiki mərhələdəki hərəkətləri azərbaycanlıların istədikləri ilə demək olar ki, tamamilə üst-üstə düşür”.
Sergey Melkonyanın açıqlamalarını “Sherg.az”a dəyərləndirən siyasi şərhçi Elmir Səftərov bildirib ki, Fransa və digər xarici ölkələr tərəfindən edilən yardımlar, verilən silahlar, Avropa İttifaqının bu ölkədəki missiyasının sayının artırılması Ermənistanın siyasi qərarvermə səlahiyyətlərinə birbaşa təsir edir:
“Maraqlı tərəflər öz mənafelərinə uyğun şəkildə Ermənistanın xarici siyasətini korrektə edirlər. Bu da məğlub Ermənistana güvən verən məsələlərdəndir. Ona görə də Ermənistan rəsmilərinin, siyasi əhəmiyyətli şəxslərinin son günlər sülh müqaviləsinin imzalanması ilə bağlı dedikləri “danışıqların vasitəçilərlə olması”, “beynəlxalq qarant mexanizmi” kimi fikirlər bu ölkənin sülh müqaviləsinin imzalanmasında fərqli maraqları önə çəkməsini və zaman qazanaraq müxtəlif süni maneələrlə prosesi yubatdığını göstərir”.
E. Səftərov qalib ölkə kimi Azərbaycan danışıqların birbaşa dialoq vasitəsilə iki dövlət arasında aparılmasının tərəfdarı olduğunu vurğulayıb:
“Sülhə aparan yolda Azərbaycan ilə Ermənistan arasında hərbçilərin qarşılıqlı surətdə azad edilməsi barədə razılığın əldə olunması vasitəçilərə ehtiyac olmadan da məsələlərin həllinin mümkünlüyünü göstərdi. Amma görünür ki, Ermənistanda hələ də müxtəlif ambisiyaları olan revanşist qüvvələr öz fikirlərini diqtə etməyə çalışırlar. Ermənistanın sürətlə silahlanması da sülh müqaviləsinin gündəmdə olması fonunda diqqətləri cəlb edir. O zaman sual yaranır əgər Ermənistan həqiqətən də Azərbaycanla sülh sazişi imzalamaq istəyirsə, son illər niyə hərbi büdcəsini daha da artırıb? Demək ki, rəsmi İrəvan hələ də region üçün təhdid olaraq qalır. Tarixə nəzər salsaq görərik ki, Ermənistanın təcavüzkar siyasəti, hərbi təcavüzü, beynəlxalq platformalardakı mövqeyi bu məsələdə destruktiv mövqe tutması ilə nəticələnib. Ona görə də Ermənistan sülh sazişinin imzalanması üçün şərtlər irəli sürmək və hansısa, tərəfləri prosesə cəlb etmək əvəzinə səmimi addımlar atmalıdır”.
