ABŞ prezidenti Co Bayden Qəzza zolağında başlayan atəşkəslə bağlı mətbuat konfransı keçirib.
Sherg.az xəbər verir ki, razılaşma üçün uzun müddətdir diplomatik vasitələrlə çalışdıqlarını və nəhayət bu razılığa gəlməkdən çox məmnun olduqlarını ifadə edən Bayden, atəşkəs razılaşmasının may ayında təqdim etdiyi layihə ilə demək olar ki, eyni olduğunu bildirib.
"Bütün iztirablardan, dağıntılardan və insan itkilərindən sonra bu gün Qəzzada silahlar susdu. Bu, mayın 31-də qeyd etdiyim razılaşma idi", - Co Bayden deyib.
İsrail və Livan arasında əldə olunan atəşkəs razılaşmasının regional sülhə doğru əhəmiyyətli irəliləyiş olduğunu bildirən Bayden, "Qəzzada bu razılaşmanın tam şəkildə həyata keçirilməsini gözləyirəm" deyə vurğulayıb.
"Amerikanı regionda daha geniş bir müharibəyə sürükləmək riskini gözə aldım. Əgər getdiyim yoldan əl çəksəydim, bu gün gördüyümüz atəşkəsə nail ola bilməzdik. İndi isə bölgə əsaslı şəkildə dəyişib" deyən Bayden bunları qeyd edib: “İran onilliklərin ən zəif nöqtəsindədir, Həmas və Hizbullah da ciddi şəkildə zəifləyib”.
