AĞ Partiyanın seçkilərdə öz namizədi olacaq?

Yusif Nəzərli 05:35 27.12.2023 Siyasət 707

Yaxın günlərdə rəsmi və yekun qərar ictimaiyyətə açıqlanacaq

"AĞ Partiyada 2024-cü ilin fevralın 7-də keçiriləcək növbədənkənar prezident seçkisində iştirak edib-etməməklə bağlı ümumi mövqe mövcuddur". Bu barədə "Sherg.az"a açıqlamasında AĞ Partiyanın sədr müavini Əhəd Məmmədli deyib. Partiya funksioneri deyib ki, ancaq hələlik rəsmi açıqlama verilməyib: "Biz real vəziyyəti yaxşı bilirik və prosesləri düzgün dəyərləndiririk. Prezident seçkisində iştirak etmək üçün nə qədər resursların tələb olunduğunun fərqindəyik. Nəzərə alaq ki, seçki növbədənkənar və qəfil elan olundu. Heç kim bunu gözləmirdi. Partiyalar əsasən parlament və bələdiyyə seçkilərinə, o cümlədən ehtimal edilən referenduma hazırlıq görməyi planlayırdılar. Bütün bunları nəzərə alaraq, yaxın günlərdə rəsmi və yekun qərarımızı ictimaiyyətə açıqlayacağıq. Bir daha qeyd edirəm ki, 2024-cü il seçkilər ili olacaq. Azərbaycandakı siyasi durumun reallığını göz önündə tutsaq, bir müxalif partiyanın qısa aralıqlarla bir neçə mühüm seçkidə iştirakı çox çətindir. Qərarımız da bu yöndə olacaq".