Almaniyada qanunsuz miqrasiyaya qarşı əməliyyatlar keçirilir. Əməliyyatlar zamanı qanunsuz sığınmış şəxslər ölkələrinə deportasiya olunur, bəziləri həbs edilirlər. Məlumatlara görə, alman polisi əməliyyatlar nəticəsində iki Azərbaycan vətəndaşını da saxlayıblar. Polisin azərbaycanlılardan ibarət dəstənin digər üzvlərini də axtardığı bildirilir. Məsələ ilə bağlı Sherg.az-a açıqlama verən siyasi şərhçi Azər Həsrət alman polisinin insanları saxlaması o qədər də təəccüblü deyil.
Onun sözlərinə görə, təəccüblənəsi məqam prosesin niyə bu qədər gec baş verməsidir:
“Bu hadisələr haqqında illərdir danışırıq ki, siyasi mühacir alveri ilə məşğul olan dəstələr var. Belə dəstələrin özəlliklə Almaniyada fəaliyyət göstərdiyini deyirik. Amma təəssüf ki, Azərbaycanda siyasi müxalifətçiliklə məşğul olan şəxslər bizim bu çıxışlarımızı rədd edir, guya yalan danışdığımızı, şər, böhtan atdığımızı iddia edirlər. Əlbəttə biz boşuna danışmırdıq və əlimizdə kifayət qədər informasiya var idi ki, ona əsaslanıb danışırdıq. İndi alman polisinin bir qrup insanı saxlaması, bu əməliyyatı prokurorluğun sanksiyası ilə keçirməsi ondan xəbər verir ki, alman polisinin əlində çox ciddi dəlillər var. Həmin dəlillərə əsaslanaraq bu qədər geniş miqyaslı əməliyyat həyata keçiriblər. Bu olanlarda konkret olaraq siyasi partiyanın, yəni Müsavat Partiyasının adı hallanır. Yəni, partiyanın Avropadakı kordinasiya mərkəzinin üzvlərindən söhbət gedir. Təbii ki, bizim də Müsavat Partiyasından açıqlama istəmək haqqımız var. Azərbaycan cəmiyyətinə açıqlama versinlər ki, niyə bu hadisələr baş verib".
Azər Həsrət: "Müsavat Partiyası Azərbaycan cəmiyyətinə açıqlama versin ki, niyə bu hadisələr baş verib"
Hadisədə "zərərçəkmiş"lərə gəlincə, A.Həsrət qeyd edib ki, özü yıxılan ağlamaz:
"O adamların toruna düşənlərin əksəriyyəti ümumiyyətlə siyasətlə məşğul olan adamlar deyil. Həmin adamlar sadəcə olaraq ucuz, rahat həyat axtaran şəxslərdir. Yəni, işləmək istəməyən, özünü realizə etmək istəməyən, əziyyət çəkmədən çörək yemək istəyən adamlardır. Onlar gəlib bu dələduzların toruna düşüblər və gedib Avropada siyasi və yaxud başqa adlar altında sığınacaq almağa cəhd göstərirlər. İndi isə zaman yetişib, hesab vaxtıdır. Buyursunlar həmin adamlar hesab versinlər ki, doğurdanmı Azərbaycandan siyasi səbəblərə görə qaçıb getmək istəyənlər var. Təbii ki, belə insanlar yoxdur, ancaq bu adamların dələduzluğunun qurbanı olanlar var. Düşünürəm ki, alman polisi çox geniş araşdırma aparacaq və yəqin ki, yaxın günlərdə daha ayrıntılı bilgilərə sahib olacağıq”.
