“Aİ-nin son günlərdə verdiyi qərarlar isə birbaşa əleyhimizə yönəlib”
“Bu cür missiyaların Bakını qərarlarından və haqq işindən yayındıra bilməyəcəyini düşünürəm”
Avropa İttifaqı Ermənistanın Azərbaycanla sərhəd bölgələrinə missiya göndərmək qərarına gəlib. Bunu Ermənistanın xarici işlər naziri Ararat Mirzoyan bildirib.
Mirzoyan Rusiya xarici işlər naziri Sergey Lavrovla danışıqları zamanı bəyan edib ki, Fransa Prezidenti Emmanuel Makron və Aİ şurası sədri Şarl Mişelin təşəbbüsü ilə Praqada görüş olub, orada razılaşdırılıb ki, Aİ missiyası faktları öyrənmək üçün Ermənistana səfər edəcək və sonra yəqin ki, hesabat verəcək.
Bu gün isə Avropa İttifaqının texniki qrupu bu gün Ermənistana səfər edəcək. Qrupun məqsədi Ermənistan-Azərbaycan sərhədində yerləşdiriləcək Avropa İttifaqı missiyasının konkret yerlərini müzakirə etməkdir.
Proseslərin pərdəarxasını şərh edən Ağ Partiya sözçüsü, siyasi şərhçi Cavanşir Abbaslı “Sherg.az”a bildirib ki, missiyanın göndərilməsinin 12-13 sentyabr sərhəddə baş verən hadisələrlə bağlı olduğunu düşünür:
“Ermənistana 2.6 milyard dollar həcmində maliyə dəstəyi ayıran qurumdan bunnan artığını gözləmək olmazdı. Əslinə qalsa, bu missiya İrəvana verilən dəstəyin daha bir nümunəsidir. Artıq sərhədlər müəyyən olunduqdan sonra bu missiyanın da bir önəmi qalmayacaq. Məlum addım Ermənistanı “diriltmək” cəhdlərindən biridir. Aİ-nin son günlərdə verdiyi qərarlar isə birbaşa əleyhimizə yönəlib. Onlar çalışır ki, Qarabağ problemi qalmaqda davam etsin. Çünki məsələnin Azərbaycanın xeyrinə həll olunması ilə heç cür barışa bilmirlər. Vətən müharibəsindən sonra dəfələrlə şahidi olmuşuq. Lakin ordumuz 2-ci Qarabağ savaşında təkcə Ermənistana yox, onun arxasındakı havadarlara da güclü zərbə endirmişdi. Bu cür missiyaların Bakını qərarlarından və haqq işindən yayındıra bilməyəcəyini düşünürəm. Onlar bir tərəfdən Avropaya inteqrasiyamızı istəyir, digər tərəfdənsə bu cür qərarlar verirlər. Bu anlamda da özlərinə ziyan vururlar”.
C.Abbaslı diqqətə çatdırıb ki, Azərbaycanın yolu nə Rusiyadan, nə də Avropadan keçir:
“Bizim yolumuz Türkiyə ilə birdir və onların güclənməsi üçün əlimizdən gələn dəstəyi verməliyik. Çünki güclü Türkiyə, güclü Azərbaycan deməkdir. Ankara bizim yanımızda olduğu dönəmdə Ai, ABŞ, Rusiya və İran kimi qüvvələrin əleyhimizə verəcəkləri qərarın heç bir təsiri olmayacaq. Bu səbəbdən də sözügedən missiya uzun ömürlü olmayacaq.Onlar zamanı gəldikdə boş işlərlə məşğul olduqlarını anlayacaqlar”.
xx
