Rusiya Şimali Koreya kimi dünyadan təcrid edilmiş ölkələrə möhtac qalıb
Şimali Koreya Rusiya ordusuna dəstək üçün birbaşa 25 min nəfərlik ordu göndərməyə hazırlaşır. Məlumata görə, bu ordu Ukraynanın təmas xəttində yerləşdiriləcək, əvəzində isə Rusiya əsgərləri hücuma keçəcəklər. 2024-cü ilin noyabrında artıq 11 min şimali koreyalı hərbçi Rusiyaya göndərilmişdi və onların bir qismi Ukraynanın Kursk istiqamətindəki hücumunu dəf etməyə yardımçı olmuşdu. Bu hərbçilərdən təxminən 4 mini ya həlak olub, ya da yaralanıb.
2025-ci ilin 18 mayında çəkilmiş peyk görüntülərində əvvəllər də hərbçilərin daşınmasında istifadə olunan bir gəminin Rusiya Federasiyasının Dunay limanında lövbər saldığı əks olunub. Həmçinin, 4 iyun 2025-ci il tarixli görüntülərdə Şimali Koreyanın Sunan hava limanında yük təyyarələrinin fəaliyyət göstərdiyi müşahidə olunub. Uçuş marşrutları da əsgər daşınmasının aktivləşdirildiyini göstərir.
Politoloq Zeynal Əmrəliyev "Sherg.az"a bildirib ki, Moskvanın Pxenyandan yeni əsgər tədarükü onu göstərir ki, Rusiyanın müharibədə itkiləri kifayət qədərdir. Ekspert deyib ki, Ukrayna hücumdan əvvəl kifayət qədər pafoslu cümlələrdən istifadə edən Rusiya rəhbərliyi indi döyüşdürməyə əsgər tapa bilmir və rəqibləri qarşısında olduqca pis vəziyyətə düşüb:
"Rus hərbi komandanlığının səhvi səbəbindən ölkənin müharibədə itkiləri də kifayət qədərdir. Başqa bir məsələ odur ki, Rusiya faktiki müttəfiqsiz qalıb. Moskva özünün yaratdığı süni təşkilat KTMT üzvlərindən də real dəstək ala bilmədi. Buna görə İran və Şimali Koreya kimi dünyadan təcrid edilmiş ölkələrə möhtac qaldı. Rəsmi Pxenyan Moskvaya bu yardımları məcburiyyət qarşısında göndərir. Çünki Rusiyadan bu ölkəyə texnoloji, silah ehtiyatı və qida məhsulları gəlir. Ancaq bu proses uzunmüddətli ola bilməz. Çünki Rusiyaya əsgər yardımı həm Şimali Koreyanın öz müdafiə qabiliyyətini aşağı salır, həm də ölkənin demoqrafik inkişafına ciddi problemlər yaradır".
Analitikə görə, Şimali Koreyadan əlavə hərbi qüvvələrin müharibəyə göndərilməsi Ukrayna üçün bəzi bölgələrdə çətinlik yarada bilər:
"Hazırda Luqansk cəbhəsində vəziyyət gərgindir. Ehtimal ki, Rusiya koreyalı əsgərlərdən əsasən bu istiqamətdə istifadə edəcək. Ukraynaya yardıma heç bir ölkəni yaxın buraxmayan rəsmi Moskva özü üçüncü tərəfi müharibəyə cəlbə etməklə həm özünün gücsüzlüyünü ortaya qoydu, həm də beynəlxalq hüququ heçə saydığını hamıya göstərmiş oldu".
