Yeni fərmanla Putinin xarici müdaxilə planı rəsmiləşir
"Ukraynada uduzulan müharibə fonunda Rusiyanın hərbi gücünün dünya ağalığı üçün və supergüc kimi qəbul olunmaq üçün yararsızlığını anlayan Putin, indi də rus dilinin və "rus aləmi"nin xaricdə təbliği, rusdillilərin müdafiəsi yoluyla ekspansiya siyasətini davam etdirmək qərarına gəlib".
Bunu araşdırmaçı-jurnalist Bəybala Mirzəyev deyib.
Ekspert bildirib ki, Rusiya Prezidenti Vladimir Putinin 11 iyulda “Dövlət dil siyasətinin əsasları”nı təsdiq edən fərman imzalaması bu həqiqəti təsdiqləyir: "Putinin bu sənədi imzalaması ilk növbədə postsovet ölkələrinə müdaxilə etmək üçün zəmin hazırlamağa xidmət edir. Fərmanın məqsədləri sırasına rus dilinin beynəlxalq miqyasda mövqeyinin möhkəmləndirilməsi ilə yanaşı, Rusiya dövlətinin yalnız öz sərhədləri daxilində deyil, xaricdə də rus dilinin qorunmasını öz üzərinə öhdəlik kimi götürməsi xüsusilə ciddi narahatlıq doğurur. Belə ki, hər hansı bir ölkədə rus dilinə qarşı “təhdid və ya diskriminasiya halları” baş verərsə, Moskva bunu müdaxilə üçün əsas sayacaq. Bu, o deməkdir ki, Kreml bundan sonra istənilən ölkədə (Baltik ölkələrində, Moldovada, Qazaxıstanda, habelə Cənubi Qafqaz respublikalarında) rus dilinə qarşı uydurma "diskriminasiya"ları bəhanə edərək həmin ölkənin daxili işlərinə qarışmağa çalışacaq, suverenliyini təhdid edəcək. Yeri gəlmişkən, bugünlərdə Kremldən Ümumrusiya İctimai rəyin öyrənilməsi Mərkəzinə tapşırıq verilib ki, Azərbaycan, Özbəkistan və bir sıra digər ölkələrdə rus dilinin tədrisi və təbliği sahəsində vəziyyətin öyrənilməsinə başlanılsın".
B.Mirzəyevin fikrincə, siyahıda Azərbaycan və Özbəkistanın adlarının lap başda gəlməsi isə qətiyyən təsadüfi deyil:
"Çünki son vaxtlar hər iki türk dövlətində Rusiyanın neoimperiya silahına çevrilməkdə olan rus dilinə qarşı neqativ ictimai rəy formalaşmağa başlayıb. Məhz bu amili nəzərə alaraq Kreml rus dili faktorundan Azərbaycana və digər türk dövlətlərinə qarşı təzyiq rıçaqı kimi istifadə etməyə çalışacaq. Postsovet ölkələri Kremlin dil imperializmini önləmək və neytrallaşdırmaq üçün səylərini mütləq birləşdirməlidirlər. Orta əsrlərin barbar dövlətləri kimi hələ də işğalçı müharibələrə üstünlük verməyə davam edən Rusiyanın rus dilindən təcavüz vasitəsi kimi istifadə etməsinə əsla yol vermək olmaz".
