Ermənistan ordusunda kifayət qədər xarici ünsürlərin təsiri var
Ermənistan-Azərbaycan arasında hərbi toqquşma aktiv mərhələyə keçib. Laçındakı postumuza qarşı həyata keçirilən təxribatdan sonra Zəngilan istiqamətində saatlarla davam edən döyüşlər başlayıb. Düşmən artilleriya qurğularını, minaatanları və PUA-ları işə salıb. İyunun 16-da isə ermənilər Naxçıvan, Gədəbəy və Şuşanı atəşə tutublar. Bölmələrimiz tərəfindən qeyd olunan istiqamətlərdə adekvat cavab tədbirləri görülüb və düşmən mövqeləri sıradan çıxarılıb. Müdafiə naziri Zakir Həsənov orduya Ermənistan tərəfindən törədilə biləcək təxribatının qarşısının qətiyyətlə alınmasına hər an hazır olmaq barədə göstərişlər verib.
Politoloq Turab Rzayev "Sherg.az"a açıqlamasında bildirib ki, uzun müddətdir Ermənistan tərəfinin Azərbaycanla sərhəddə təxribat törətmək, gərginliyi artırmaq cəhdlərini müşahidə edirik. Analitik vurğulayıb ki, Laçın yolundakı nəzarət-buraxılış məntəqəsinin atəşə tutulması, sərhədin bir neçə istiqamətində atəşkəsin pozulması, rus sülhməramlılarının nəzarət etdiyi bölgədə mövqelərimizə güllə atılması bir neçə yöndə şərh olunmalıdır: "Birinci variant odur ki, baş verənlər Paşinyan hakmiyyətinin istəyi ilə reallaşır. İkinci ehtimal budur ki, Ermənistan ordusunda Paşinyandan daha çox xarici qüvvələrə bağlı olanlar təxribata əl atır. Onların da məqsədi regionda vəziyyəti qızışdırmaqdır. Üçüncüsü isə bu ikisinin paralel olaraq baş verməsidir. Reallıq ondadır ki, əslində Paşinyan bu cür insidentlərdə maraqlı olmamalıdır. Düzdür, vaxtaşırı olaraq, daxili və xarici təzyiqlər nəticəsində mövqeyini dəyişməyə məcbur qalıb. Ancaq erməni Baş nazir sülh prosesində qərarlıdır və bunu dəfələrlə elan edib".
Siyasi şərhçi bəyan edib ki, Ermənistan ordusunda kifayət qədər xarici ünsürlərin təsiri var: "Vaşinqton görüşündən əvvəlki təxribatlarda Paşinyan özü etiraf etdi ki, ordu tam şəkildə ona tabe deyil. Ordu və təhlükəsizlik sistemində "Qarabağ klanı" hələ də mövcudluğunu qoruyur. Rusiya sülhməramlı kontingentinin müvəqqəti nəzarət etdiyi ərazilərdəki separatçılar da Moskvaya tabedir. Separatçılar erməniləri Azərbaycana qarşı mübarizəyə, müqavimət göstərməyə çağırış edirlər. Demək ki, təxribatlara hazırlıq gedir və bunlar həm Qərb, həm də Rusiya tərəfindən dəstəklənə bilər. Son günlər bəzi ölkələrin Ermənistanda fəallaşmasının şahidi oluruq. Xüsusən İran, Fransa və Hindistan Ermənistanı açıq şəkildə dəstəkləyir. İran ermənilərə silah göndərir. Həmin dövlətlər də bölgədə gərginliyin artmasında, yeni münaqişə ocağının yaranmasında maraqlıdırlar".
