Azərbaycan Ordusunun məhv etdiyi separatçı qurumu dirçəltməyə cəhd edirlər
“Məlumata görə, Milli Məclis Qərbi azərbaycanlıların tarixi vətənlərinə qayıtması məsələsi ilə bağlı bəyanat qəbul edəcək”
Qarabağdan Ermənistana qaçan Samvel Şahramanyan Xankəndidə separatçı rejimin ləğvi ilə bağlı qərarından imtina edib və bildirib ki, keçmiş qondarma rejimin "qurumları"nın buraxılmasını nəzərdə tutan heç bir "hüquqi sənəd" yoxdur. O, hətta qondarma “qurumlara” vaxtarışı olaraq “hökumətə” məlumat verməyi tapşırıb. Onun “müşaviri” kimi təqdim edilən Vladimir Qriqoryan isə bildirib ki, Şahramanyan İrəvana qayıtdıqdan sonra separatçı rejimin fəaliyyətinin davam etdirilməsi ilə bağlı “fərman” imzalayıb və əsas sənəd bu qərardır. Beləliklə, separatçılar mövcudluqlarını davam etdirməkdə israrlı görünür. Xankəndidə verilən qərarla separatçı rejimin özünü buraxması 1 yanvar 2024-cü ilə qədər başa çatmalı idi. Lakin separatçıların qaçması və erməni əhalisinin Qarabağı tərk etməsindən sonra bu qərarın heç bir əhəmiyyəti qalmadı. Bundan sonra separatçıların İrəvanda “özünübərpası” da praktiki olaraq Azərbaycana təhlükə yaratmır. Ekspertlərin fikrincə, Şahramanyanın qərardan imtina etməsi isə Ermənistan daxilində qondarma “Artsax” ideyası ətrafında baş verən qarşıdurmadan qaynaqlanır. Amma bunun əsas zərbəsi də Ermənistan hakimiyyətinə dəyəcək.
Politoloq Zaur Məmmədov "Sherg.az"a deyib ki, Şahramanyanın qeyri-qanuni qurumunun özünü buraxmasını ləğv edən “fərman” imzalaması Ermənistan hakimiyyətinin çürük revanşist siyasətini səciyyələndirir. Ekspertin sözlərinə görə, şahramanyanların “qərarları” heç nəyə təsir etmir. Amma burada vacib məqam var:
"Bu addımlar Nikol Paşinyanın yanlış siyasətinin əksi və nəticəsidir. Çünki onun iradəsi olmadan Şahramanyan belə bir "fərman" imzalaya bilməz. Söhbət həm də Fransanın və digər ölkələrin bilavasitə dəstəyi ilə İrəvanın koordinasiya etdiyi siyasətdən gedir. Azərbaycan Silahlı Qüvvələrinin məhv etdiyi separatçı qurumu dirçəltməyə cəhd edirlər. Revanşist ruhda açıqlamalar verir, "Qarabağ üçün muxtariyyət" tələbləri irəli sürürlər. Bütün bunlar belə qənaət hasil edir ki, İrəvanın “sülh gündəmi” Fransa və Hindistan silahlarının çatdırılmasını gözləməklə vaxtı mümkün qədər uzatmaqdır. Əlbəttə, Bakı mütləq buna cavab verəcək. Məlumata görə, Milli Məclis Qərbi azərbaycanlıların tarixi vətənlərinə qayıtması məsələsi ilə bağlı bəyanat qəbul edəcək".
