Tofiq Zülfüqarov: “Medinskinin dedikləri sabahın müharibə ritorikası ola bilər"
Son günlərdə Rusiya Prezidentinin köməkçisi Vladimir Medinskinin verdiyi bəyanatlar siyasi dairələrdə geniş müzakirə mövzusuna çevrilib. Ümumən, son dönəmlərdə Rusiyanın postsovet məkanına yönəlik siyasətində kəskin dəyişikliklərin şahidi oluruq. Bu proseslər, xüsusilə Ukrayna ilə münasibətlər fonunda daha qabarıq şəkildə özünü göstərməkdədir. O baxımdan Medinskinin son açıqlamaları təkcə Ukrayna ilə bağlı deyil, eyni zamanda digər keçmiş sovet respublikaları, o cümlədən Azərbaycan üçün də strateji əhəmiyyət kəsb edən bəzi mesajlar ehtiva edir.
Ekspertlərin fikrincə, belə bəyanatların təhlili Rusiya siyasətində formalaşan yeni konsepsiyanın mahiyyətini anlamağa və regionda mümkün geosiyasi dəyişiklikləri öncədən dəyərləndirməyə imkan verir.
Sabiq xarici işlər naziri Tofiq Zülfüqarov "Sherg.az"a deyib ki, savadlı və təşəbbüskar bir şəxs kimi Medinski, həm də Rusiya xarici işlər naziri Sergey Lavrovun mümkün varisi kimi nəzərdən keçirilir. Lakin onun danışıqlar heyətinin rəhbəri qismində səsləndirdiyi bəzi qalmaqallı fikirlər Kremlin Ukraynaya qarşı gələcək planlarının konseptual əsaslarını ortaya qoymaqdadır. T.Zülfüqarovun sözlərinə görə, danışıqlar heyətinin rəhbəri kimi qalmaqallı bəyanatında Medinski ya səhvən, ya da qəsdən Kremlin Ukraynaya qarşı gələcək fəaliyyətinin konseptual əsasını açıqladı:
"Medinskinin açıqlamalarından çıxarılan əsas nəticələr bunlardır. Rusiya Federasiyası Ukraynaya münasibətdə 1991-ci ildə qəbul olunmuş Almatı Bəyannaməsinin prinsiplərini rədd edir. Rusiya ilə Ukrayna arasında imzalanmış əvvəlki müqavilə və razılaşmalar siyasi baxımdan yenidən nəzərdən keçirilə və dəyişdirilə bilər. Prezident Vladimir Putin tərəfindən əvvəllər səsləndirilmiş “kim SSRİ-yə hansı sərhədlərlə daxil olubsa, həmin sərhədlərlə də çıxmalıdır” prinsipi, Moskvanın keçmiş sovet respublikalarına münasibətdə yeni siyasətinin əsasını təşkil edə bilər. Rusiya yalnız Ukraynanın işğal olunmuş ərazilərini Rusiya Federasiyasının bir hissəsi kimi tanıdığı halda atəşkəs rejiminə razılıq verə bilər. Medinskinin "Azərbaycan mövzusuna" dair bəyanatındakı tezislər əsas məsələ deyildi və bizim üçün qəbuledilməz olan siyasi leksika, əslində, Mariya Zaxarovanın cavabında təkzib edildi. Lakin səsləndirilmiş digər şərhlər - "strateji əməkdaşlıq münasibətləri kontekstində daha balanslı mövqe zərurəti" açıq və birmənalı şəkildə Azərbaycanın "Putin konsepsiyasına" qoşulmasına çağırış kimi səslənir. Yəni SSRİ-yə kim nə ilə daxil olubsa, onunla da çıxmalıdır. Əgər bu, həqiqətən belədirsə, o zaman Ermənistanın Batum və Moskva müqavilələrindəki sərhədlərə (9700 kv.km.) qayıdışı Cənubi Qafqazda yeni bir trendə çevrilə bilər. Odur ki, cənab Medinskinin "etiraflarının" davamı yəqin ki, getdikcə daha maraqlı olacaq". Keçmiş XİN başçısı vurğulayır ki, istər Ukraynanın, istərsə də Danimarka Krallığının ərazi bütövlüyünün qorunması həmin ölkələrin hökumətlərinin və xalqlarının vəzifəsidir: "Azad Qrenlandiya, Korsika və ya Azad Zəngəzur kimi anlayışlar isə müasir dövrün geosiyasi diskursunda getdikcə daha aktual şəkildə səslənir".
