Gürcüstanın yeddi müxalif partiyası birgə bəyanat yayaraq konsolidasiya elan edib.
APA-nın yerli bürosu xəbər verir ki, sənədi “Axali”, “Girçi – Daha çox azadlıq”, “Droa”, Milli Demokrat Partiyası, Avropalı Gürcüstan, “Azadlıq meydanı” və Federalistlər partiyası imzalayıb.
Bəyanatda bildirilib ki, partiyalar hakimiyyəti xalqa qaytarmaq üçün sona qədər mübarizə aparacaqlar.
“Aramızda bir çox fikir ayrılıqları olsa da, bizi bir vəzifə birləşdirir: dinc mübarizə ilə rejimi dəyişdirmək. Mübarizəmiz sona qədər, qələbəyə qədər davam edəcək”, - sənəddə deyilir.
Qeyd edək ki, ötən gün Gürcüstanın Baş Prokurorluğu Mixeil Saakaşvili, müxalifət liderləri - Giorgi Vaşadze, Nika Qvramiya, Nika Meliya, Zurab Caparidze, Elene Xoştariya, Mamuka Xazaradze və Badri Caparidzeyə qarşı cinayət işi açıldığını bildirib. Onlar dövlət əleyhinə bir sıra ağır cinayətlərdə ittiham olunurlar.
Bundan başqa, Gürcüstan parlamenti ötən həftə Saakaşvilinin təsis etdiyi Vahid Milli Hərəkat Partiyası, “Dəyişikliklər naminə” koalisiya və “Lelo - Güclü Gürcüstan” partiyasının fəaliyyətinin qadağan edilməsi iddiası ilə Gürcüstanın Konstitusiya Məhkəməsinə müraciət edib.
