Bu gün Azərbaycanda 28 May – Müstəqillik Günü (Respublika Günü) qeyd olunur.
Sherg.az xəbər verir ki, 1918-ci ilin məhz bu günündə Şərqdə ilk parlamentli demokratik respublika olan Azərbaycan Xalq Cümhuriyyətinin yaradılması elan edilib.
Milli Şuranın qəbul etdiyi İstiqlal Bəyannaməsi ilə Azərbaycan xalqının müstəqilliyi dünyaya bəyan olunub və ölkənin demokratik dövlətçilik əsasları formalaşdırılıb. Cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti dövlət quruculuğu, parlament ənənələri, milli ordu yaradılması, təhsil və insan hüquqları sahəsində mühüm addımlar atıb.
Tarixçilərin fikrincə, həmin dövrdə qadınlara seçki hüququnun verilməsi, çoxpartiyalı parlamentin yaradılması və milli dövlət institutlarının qurulması Azərbaycanı regionda fərqləndirən əsas amillərdən olub.
Hazırda ölkə üzrə 28 May münasibətilə müxtəlif tədbirlər, konsert proqramları və rəsmi mərasimlər keçirilir. Paytaxt Bakı başda olmaqla bölgələrdə dövlət bayraqları qaldırılıb, şəhidlərin xatirəsi yad edilir.
Azərbaycan dövlətçiliyinin əsas sütunlarından biri hesab olunan 28 May tarixi xalqın milli azadlıq və müstəqillik iradəsinin rəmzi kimi qiymətləndirilir.
