Nəsiman Yaqublu:“1967-ci ildə ortada sübut-dəlil olmadığı halda iki nəfər azərbaycanlını məhkəmə prosesindən çıxarıb yandırdılar”
“Odur ki, ermənilərin Başlıbel kəndində də cinayətlər törətdiyinə inanıram”
“İşə beynəlxalq mütəxəssislər, hüquqşünaslar cəlb edilməlidir. Təəssüf ki, biz bu məsələdə gecikirik”
“Ən gənci 12 yaş. Ən yaşlısı 95 yaş. Nə uşaq tanıdılar, nə də qoca. 1993-cü ilin aprel ayında Ermənistan Silahlı Qüvvələri tərəfindən Kəlbəcər rayonunun Başlıbel kəndində sığındıqları evdə qətlə yetirilən 12 nəfərin meyitlərinin qalıqları aşkar edilib”.
Bu sözləri Sosial Tədqiqatlar Mərkəzinin mətbut xidmətinin rəisi, beynəlxalq məsələlər üzrə ekspert Əziz Əlibəyli yazıb.
Deməli, dünya ictimaiyyəti, o cümlədən ABŞ, belə demək mümkünsə, gözündəki eynəyin ləkələrini təmizləməli və planetdə baş verənləri olduğu kimi- şəffaf görməlidir.
BDU-nun Jurnalistika fakültəsinin professoru, tarixçi-alim Nəsiman Yaqublu da belə düşünür. Onun fikrincə, biz informasiya təxribatlarına qarşı əks-arqumentlərlə cavab verməliyik:
“Birinci Qarabağ müharibəsindəki hadisələr kifayət qədər araşdırılmayıb. Həmin qətliamlar yalnız Xocalı faciəsi ilə bitmir. Digər bölgələrdə də analoji hadisələr baş verib. İnsanlar diri-diri yandırılıb. Əslində bu cinayətlər savaşdan çox əvvəl başlayıb. Məsələn, 1967-ci ildə ortada sübut-dəlil olmadığı halda iki nəfər azərbaycanlını məhkəmə prosesindən çıxarıb yandırdılar. Odur ki, ermənilərin Başlıbel kəndində də cinayətlər törətdiyinə inanıram. Çünki həmin toplum elə bunun üçün yaranıb”.
N.Yaqublu, həmçinin bildirdi ki, baş verənlər cinayətlər arxivləşdirilməlidir:
“Həmin olaylar mütləq sənədləşməli, yaşayan şahidlərin ifadələri alınmalıdır. Məsələn, 1918-1920-ci illərdə fövqəladə istintaq komissiyası yaradılmış və 5 mindən çox şahidin ifadəsi alınmışdı. Həmin ifadələr sonradan hüquqi sənədə çevrildi. Biz yenə elə etməliyik. Tarixi həqiqətlər məişət səviyyəsindəki dialoqlardan çıxmalı, beynəlxalq hüquqi sənəd statusu almalıır. İşə beynəlxalq mütəxəssislər, hüquqşünaslar cəlb edilməlidir. Təəssüf ki, biz bu məsələdə gecikirik”.
