“Amma indi vəziyyət dəyişib. Avropa erməni yalanlarını qəbul etmir”
“Elə Rusiya da Ermənistandan əlini üzüb. Tovuz döyüşlərindən sonra Kreml etiraf etdi ki, ilk həmlə ermənilərdən gəlib”
“Ermənilər beynəlxalq məhkəməyə verilməli, alman faşistlərinin aqibətini yaşamalıdırlar”
Bu gün Goranboy rayonunun Ballıqaya kəndində Ermənistan silahlı qüvvələrinin törətdikləri qətliamdan 28 il ötür. Həmin hadisə zamanı qaniçən ermənilər aralarında 6 azyaşlı uşaq, həmçinin 6 aylıq körpə və 93 yaşlı ahıl qadın da olmaqla, 24 nəfər azərbaycanlı mülki şəxsi amansızlıqla qətlə yetiriblər. Əksəriyyəti uşaqlar, qadınlar və qocalar olan qətlə yetirilmiş şəxslərin bəzilərinin meyitləri yandırılıb. Qətliam nəticəsində üç azyaşlı uşaq hər iki valideynini itirib.
Ballıqaya qətliamı Ermənistan silahlı qüvvələrinin bundan əvvəl Xocavəndin Qaradağlı kəndində, Xocalı şəhərində, Kəlbəcərin Ağdaban kəndində Qarabağın azərbaycanlı əhalisini kompakt şəkildə məhv etmək məqsədi ilə törədilən silsilə kütləvi qırğın aktlarından biridir.
Azərbaycan cəmiyyəti sözügedən hadisəni dərin hüznlə xatırlayır. Qeyd edək ki, Xarici İşlər Nazirliyimiz bu barədə bəyanat imzalayıb.
Ballıqaya hadisələri ilə bağlı “Sherg.az”a danışan tarixçi-alim Dilavər Əzimli qeyd edib ki, bu və digər oxşar hadisələr Rusiyanın “dirijorluğu” ilə həyata keçirilib:
“Ermənilərin bütün belə xainliklərinin arxasında Rusiyanın əli var. Hətta ruslar özləri də ermənilərin əməllərini görüb bəzən dəhşətə gəlirdilər. Amma mövcud vəziyyəti nəzarətdə saxlamaq məqsədilə onlardan istifadə edirdilər.
Həmişə olduğu kimi, Ballıqaya hadisələrində də Ermənistanın arxasından Rusiya çıxıb, dünya dövlətləri onu dəstəkləyib.
Amma indi vəziyyət dəyişib. Avropa erməni yalanlarını qəbul etmir. Elə Rusiya da Ermənistandan əlini üzüb. Tovuz döyüşlərindən sonra Kreml etiraf etdi ki, ilk həmlə ermənilərdən gəlib”.
Tarixçinin fikrincə, intiqam almayınca rahat nəfəs almağa haqqımız yoxdur:
“Keçmişdən ibrət götürməliyik. Çünki tarix həm də nəticədir. Biz nəinki bu hadisələri unutmamalı, hətta intiqam üçün təbliğat aparmalıyıq. Azərbaycan xalqı heç vaxt şovinist siyasət yürütməyib.
Əksinə, daim Tanrı ədalətinə sığınıb. İntiqamımızı almalıyıq. Ermənilər beynəlxalq məhkəməyə verilməli, alman faşistlərinin aqibətini yaşamalıdırlar. Onda düşmən tamamilə tək qalacaq, arxasındakılar hərəsi bir yana çəkiləcək.
Mən jurnalist kimi çalışdığım illər ərzində Ballıqaya qurbanlarının yaxınları ilə görüşmüş, söhbət etmişəm. İnanın, həmin dəqiqələrdə göz yaşlarıma hakim ola bilmirdim və indi olduğu kimi intiqam arzulayırdım. Onsuz da bizim işimiz qadınlarla, körpələrlə deyil, terroristlərlədir”.
