Azərbaycan, Türkiyə və Rusiya arasında dəmir yolu sahəsində üçtərəfli əməkdaşlıq formatında daha bir layihəyə başlanılıb. Bu dəfə Türkiyədən Rusiyaya ixrac yüklərindən ibarət konteyner qatarı yola salınıb. “ADY Konteyner” MMC-dən bildirilib ki, 15 konteynerdən ibarət qatar Türkiyənin Ankara şəhərindən Rusiyanın Vorsino stansiyasına istiqamət götürüb. Qatarın ümumilikdə 4650 kilometrlik polad magistralı 8 günə qət edəcəyi gözlənilir. 40 futluq konteynerlərdən ibarət olan qatarın yükü əsasən Türkiyə istehsalı olan məişət əşyalarıdır. Yükün ümumi çəkisi isə 150 tondur.
Qatar Bakı-Tbilisi-Qars dəmir yolu və “Şimal-Cənub” Nəqliyyat Dəhlizi vasitəsilə Türkiyə, Gürcüstan, Azərbaycan ərazisindən keçərək Rusiya ərazisinə daxil olacaq.
Daşımanın operatorları “Pasifik Eurasia Logistics” (Türkiyə), “GR Logistics” (Gürcüstan), “ADY Konteyner” (Azərbaycan) və Rusiyanın “Russian Railways Logistics” şirkətləridir.
Qeyd edək ki, ötən ilin sonunda Türkiyədən Çinin Sian şəhərinə 2 ixrac qatarı çatdırılıb. İqtisadçı- ekspert Ruslan Atakişiyev bu barədə “Sherg.az”a danışarkən gələcək perspektivləri də qiymətləndirib:
“Bildiyiniz kimi, bu dəmir yolu Şərqlə Qərbi, daha dəqiq desək, Çinlə Avropanı birləşdirir. Və iki alternativ yola nisbətən vaxta 2-3 dəfə qənaət olunur.
Məsələn, əgər mallar digər yollarla 45 günə daşınırsa, indi eyni əməliyyat üçün 12 gün lazım gəlir. Həmçinin qonşu ölkələrlə də əlaqələr güclənəcək.
Onu da deyim ki, region ölkələri arasında ticarət inkişaf etdikcə ikinci dəhlizin yaranması da mümkündür”.
