"15 iyun Azərbaycan tarixinin xilas günüdür".
Bunu "Sherg.az"a açıqlamasında YAP Səbail rayon təşkilatının Gənclər birliyinin sədr muavini Fuad Heydər deyib.
Gənc fəal bildirib ki, 1993-cü il hakimiyyətə gələn Ulu Öndər Heydər Əliyev ölkəmizi parçalanmaq təhlükəsindən xilas etdi:
"XX əsrin sonlarında yenidən müstəqillik qazanmaq kimi tarixi fürsəti əldə edən Azərbaycan qısa vaxtdan sonra onun itirilməsi təhlükəsi ilə üzləşdi. 1993-cü ilin iyununda ölkədə hakimiyyət böhranı son həddə çatdı, xaos və anarxiya respublikanı bürüdü. Vətəndaş müharibəsi dərəcəsinə yüksəlmiş qarşıdurma nəinki dövlət müstəqilliyimizi, hətta milli varlığımızı belə birbaşa hədəfə aldı. 1991- 1993-cü illər ölkəmizin müasir tarixində hərc-mərclik, özbaşınalıq dövrü kimi xatırlanır.
Siyasi hadisələrə qiymət vermək, gələcəyi görmək imkanlarından məhrum olan, adi vəziyyətdən belə çıxış yolu tapmağa qadir olmayan şəxslərin rəhbərlik etməsi ilə bunlar baş verirdi. Ümummilli lider Heydər Əliyev deyirdi:
“Azərbaycan böyük təhlükə qarşısında idi. Çünki Azərbaycanın müstəqil yaşamasının əleyhinə olan həm daxildəki qüvvələr güclü idi, həm də Azərbaycan kimi böyük coğrafi-strateji əhəmiyyətə, zəngin təbii sərvətlərə malik olan ölkənin tam müstəqil olması başqa ölkələrdə bəzi dairələri qane etmirdi. Ermənistanın Azərbaycana etdiyi təcavüz və bunun nəticəsində Azərbaycanın zəifləməsi, məğlubiyyətə uğraması, ikinci tərəfdən də daxildə hakimiyyət çəkişməsi 1992-ci ilin iyun ayında hakimiyyətə gəlmiş qüvvələri bir ildən sonra hakimiyyətdən saldı, xalq özü saldı”. İyunun 15-də Heydər Əliyev Azərbaycan Ali Sovetinin sədri seçildi".
F.Heydər bildirib ki, Ulu Öndər böyük risklərə baxmayaraq, xalqın qurtuluşu missiyasını cəsarətlə öz üzərinə götürdü:
"1993-cü il oktyabrın 3-də Ümummilli Lider xalqımızın böyük əksəriyyəti tərəfindən ölkə Prezidenti seçildi. Heydər Əliyev prezident seçildikdən sonra ölkədə ciddi dəyişiklillər etdi və ölkəmiz sözün əsl mənasında xilas oldu. Hal hazırda Heydər Əliyevin uğurlu siyasətini İlham Əliyev uğurla davam etdirir. Mən də öz növbəmdə bütün xalqımızı Milli Qurtuluş günü münasibətilə təbrik edirəm. Müstəqilliyimizin daim olması diləyi ilə".
