"Ali təhsil haqqında" qanun hazırlanır: "Beynəlxalq təcrübədən yararlanılacaq"

Fidan Həmişəyeva 11:20 28.08.2019 Elm və Təhsil 760

Milli Məclisin payız sessiyası üçün əsas prioriteti “Ali təhsil haqqında” qanun layihəsinin müzakirəyə çıxarılmasıdır. Milli Məclisin Elm və təhsil komitəsinin sədri İsa Həbibbəyli bildirib ki, komitə sözügedən qanun layihəsi üzərində iş aparır:
“Artıq İşçi qrupu müəyyənləşdirilib. İşçi qrupunun tərkibinə həm Milli Məclisin Elm və təhsil komitəsinin üzvləri, həm də Təhsil Nazirliyinin və digər təhsil qurumlarının nümayəndələri daxildir. Bildiyiniz kimi, biz iyul ayında "Ali təhsil haqqında" qanun layihəsini İşçi qrupu ilə birlikdə müzakirə etmişik”.
Deputat söyləyib ki, komitə üzvü olan deputatlara və İşçi qrupunun digər üzvlərinə tapşırıqlar verilib:
“Ali təhsil haqqında” qanun layihəsinin maketi hazırlanıb və komitə üzvlərinə təqdim olunub. Düşünürəm ki, yay tətili müddətində deputatlarımız və İşçi qrupunun üzvləri öz təkliflərini hazırlayıblar. Biz komitənin sentyabr ayında keçirəcəyimiz iclasında bu sənədin ilkin layihəsini təkliflər əsasında formalaşdıracağıq. Çalışacağıq ki, qanun layihəsini payız sessiyasının plenar iclaslarına müzakirəyə çıxaraq”.
Qanun layihəsi ilə bağlı Sherg.az-a açıqlama verən millət vəkili Asim Mollazadə bildirdi ki, hazırda layihə üzərində müəyyən işlər gedir:
“Qanunla bağlı mən də təkliflərimi hazırlamışam və komitənin iclasında onları təqdim edəcəm. Düşünürəm ki, hazırda qanun layihəsi barədə məlumat verməyə ehtiyac yoxdur. Ümumiyyətlə, “Ali təhsil haqqında” qanun çox mühümdür. Təhsil və elmlə bağlı olan qanunlar ölkəmizin yalnız təhsil sistemi ilə bağlı gələcəyi üçün deyil, eyni zamanda iqtisadiyyatımza da mühüm töhfələr verir” .
Deputat qeyd edib ki, “Ali təhsil haqqında” qanun tətbiq edilən zaman mütləq xarici ölkələrin də təcrübələrindən yararlanacağıq:
“Bir sıra xarici ölkələrin təhsil sistemləri ilə bağlı işlər aparıb müsbət təcrübələri Azərbaycan təhsilinə tətbiq etməliyik. Necə ki, “Peşə təhsili haqqında” qanun qəbul edilən zaman alman peşə təhsili sistemi ilə bağlı mütəxəssisələr bu prosesdə iştirak edirdilər. Məlumdur ki, dünyada ən uğurlu peşə təhsili sistemi məhz Almaniyadadır. Həmçinin “Ali təhsil haqqında” qanunun tətbiqi zamanı da dünya təcrübəsindən yararlanmaqda fayda var”.