Bu ali məktəbin bir sıra ilklərlə yaddaşlara yazılacağına da şübhəmiz yoxdur
“Qarabağ Universitetinə adlı-sanlı, yüksək keyfiyyətli kadr potensialı - professor, müəllim, alim gərəkdir”
Xaricdə Yaşayan Azərbaycanlı Alimlərin Forumunda çıxış edən elm və təhsil naziri Emin Əmrullayev Qarabağ Universitetinin fəaliyyətindən söz açıb.
Nazir deyib ki, növbəti həftə 1200 tələbə 100 müəllim ilə tədrisə başlayacaq universitet Azərbaycan tarixinin çox önəmli səhifəsidir. O həmçinin qeyd edib ki, Qarabağ Universitetində əvvəlki səhvlərə yol verilməyəcək.
Nazirin fikirlərini şərh edən Sosial Tədqiqatlar Mərkəzinin sektor müdiri, elm və təhsil məsələləri üzrə tədqiqatçı Elmin Nuri də “Sherg.az"a açıqlamasında Qarabağ Universitetinin vacib və əhəmiyyətli layihə olduğunu deyib. Onun sözlərinə görə, Xankəndidə fəaliyyətə başlayan bu Universitet digər ali təhsil müəssisələrindən xeyli fərqlənəcək:
“Biz ixtisas seçimi zamanı abituriyentlərlə konsultasiya edəndə Qarabağ Universitetinin fəaliyyətə başlamasının nə dərəcə əhəmiyyətli olduğunun fərqinə vardıq. Hər 10 abituriyentdən 7-si balından və ixtisas qrupundan asılı olmayaraq məhz Qarabağ Universitetini seçmək istəyirdilər. İnanırıq ki, Qarabağ Universiteti digər ali təhsil müəssisələrindən fərqlənəcək. Bu Universitetin bir sıra ilklərlə yaddaşlara yazılacağına da şübhəmiz yoxdur”.
Sektor müdirinin sözlərinə görə, Qarabağ Universitetində tədris olunacaq ixtisasların çoxu digər universitetlərdə keçirilən ənənəvi ixtisaslardır: “Amma bu o demək deyil ki, Qarabağ Universiteti də mütləq həmin universitetlərin bir başqa variantı olacaqdır. Qarabağ Universitetinin əsas özəlliyi tədqiqatyönümlü universitet olmasından qaynaqlanacaq. Bu gün bizdə sırf tədqiqatyönümlü universitet yoxdur. Dünyanın çağdaş təhsilli əsas meyarlarından biri də universitetlərin tədqiqat istiqamətində fəaliyyət göstərməsidir. İnanırıq ki, Qarabağ Universiteti buna nail olacaq. Qarabağ Universitetinə adlı-sanlı, yüksək keyfiyyətli kadr potensialı - professor, müəllim, alim gərəkdir. Paytaxtdakı ən adlı-sanlı ali təhsil müəssisələri belə tədqiqatyönümlü tədris metodunu uğurla həyata keçirə bilmirlər. Universitetlərimiz öz fəaliyyətlərini daha çox nəzəri baza, sovet ali təhsil modeli üzərində qurub. Qarabağ Universiteti isə dediyim kimi, tədqiqatyönümlü təhsil verə biləcək, sırf klassik universitet tədrisinə yox, müasir dünyanın tələb etdiyi tədqiqatyönümlü təhsilə, elm və biznesin tələb etdiyi tədris formasına xüsusi önəm verəcəkdir. Bununla dünya universitetlərinin reytinq cədvəlindəki yerinə də müəyyən təsir göstərə bilər.
İnanıram ki, Qarabağ Universiteti dördüncü sənaye inqilabının tələbləri nəzərə alınaraq qurulacaq və bu ali təhsil müəssisəsində Azərbaycanın rəqəmsal transformasiyasını təmin edə biləcək insan kapitalı formalaşdırılacaq.
Qloballaşma dövründə universitetlərin formalaşması və transformasiyası bir çox cəhətdən qlobal trend və çağırışlar nəzərə alınmaqla baş verir. Biliklərin, eləcə də texnoloji proseslərin sürətlə dəyişdiyi dünyada universitetlər rəqabətə davamlılığı və dayanıqlılığı təmin etmək məqsədilə bu dəyişikliklərə çevik reaksiya vermək məcburiyyətindədirlər. Yeni qurulan universitetlərdə bu mühiti yaratmaq daha asandır.
Bu gün dünya universitetlərini ölçən, onların inkişafını müəyyənləşdirən reytinq cədvəlləri var ki, təəssüf ki, bizim universitetlər oraya yaxın düşə bilmir. İnanırıq ki, Qarabağ Universitetinin tutduğu xətt, oraya göstəriləcək diqqət, şaxəli profili, dünya təhsili ilə uzlaşması bizim bu həsrətimizə son qoyacaq”.
