Mayın 12-də intellektual mübadilə və əməkdaşlıq təşəbbüslərinin mayakı olan “Qlobal Təhsil Sammiti 2024” keçirilib.
“Sherg.az” xəbər verir ki, bu sammit təhsil liderlərini, pedaqoqları, müəllimləri bir araya toplayıb.
Təhsildə düşüncə liderlərini və innovatorları bir araya gətirməklə sammit təhsilin trayektoriyasını formalaşdıracaq gələcək innovasiyaları ruhlandırmaq məqsədi daşıyır.
Qlobal Təhsil Sammiti 2024 çərçivəsində təhsil gələcəyinin formalaşdırılmasında beynəlxalq əməkdaşlığın əhəmiyyəti müzakirə edilib.
Layihənin Azərbaycan üzrə səfiri Solmaz Süleymanovanın moderatorluğu ilə Sammitdə əsas diqqət təhsil işçilərinin davamlı peşəkar inkişafı ehtiyacı, onların ən son tədris metodologiyaları, texnologiyaları və pedaqoji strategiyalarla təchiz olunmasının təmin edilməsinə yönəldilib. Fərdiləşdirilmiş öyrənmə təcrübələrindən tutmuş təhsil qərarlarının qəbulu üçün məlumatlara əsaslanan anlayışlara qədər, süni intellektin təhsildə transformativ təsirinə dair məsələlər müzakirə edilib. Təhsil resurslarını, infrastrukturu və ümumi keyfiyyəti artırmaq üçün hökumətlər, özəl sektor qurumları və qeyri-kommersiya təşkilatları arasında əməkdaşlıq haqqında fikir mübadiləsi aparılıb.
"Alert Knowledge Services" şirkətinin baş direktoru Dr. Dinesh Kamra “Təhsilin Gələcəyi: İnnovasiya və Tətbiq arasındakı boşluqların aradan qaldırılması” barədə çıxış edib.
Avropa Azərbaycan məktəbinin direktoru Francesco Banchini “Təhsildə süni intellekt: Müəllimlərin səlahiyyətləndirilməsi və öyrənmənin fərdiləşdirilməsi” haqda sessiyada fikirlərini bölüşüb.
AzETA-nın (Azərbaycan İngilis Dili Müəllimləri Assosiasiyası) təsisçisi və prezidenti Rəqsanə Məmmədova “Qlobal Tərəfdaşlıqların Qurulması: Birgə Öyrənmə, Paylaşılan Resurslar və Sərhədlər Arasında Bağlantı” ilə bağlı mövzuda danışıb. Abxaziya Muxtar Respublikası Ali Şurasının ictimaiyyətlə əlaqələr və informasiya texnologiyaları xidmətinin rəhbəri Nana Kvaratsxeliya “Mikrotəlim və Qarışıq Öyrənmə: Rəqəmsal Əsr üçün Çevik Öyrənmə İmkanları” istiqamətində sessiyada rəylərini iştirakçılarla paylaşıb.
ITE (Təhsildə İnnovativ Texnologiyalar) üzrə təlimçi Arifə Rəsulova “test tapşırıqlarının yazılması üçün tələblər” barədə mülahizələrini irəli sürüb. Bakı Avropa Liseyinin direktoru Zülfiyyə Veysiyova isə “Öyrənmə mühitinin yenidən təsəvvür edilməsi: fərdiləşdirilmiş öyrənmə, çevik yollar və dəyişən sinif otağı” haqqında sessiyada çıxış edib.
Bütövlükdə iki panel sessiyadan sonra Azərbaycan musiqisi səsləndirilib, milli rəqsi nümayiş edilib. Sonda iştirakçılara sertifikatlar təqdim olunub.
