Avropa fondları radikalizmin maliyyələşdirilməsində əsas alətə çevrilib.
“Report”un yerli bürosu xəbər verir ki, bunu Gürcüstanın Baş naziri İrakli Kobaxidze Acarıstanda yayımlanan “Azad Məkan” ictimai proqramında çıxışı zamanı səsləndirib.
O bildirib ki, Avropa fondlarının fəaliyyəti ölkədə radikalizmin və inqilabi meyillərin yayılmasına təkan verib.
“Təəssüf ki, bu hallar Avropa Parlamentinin qəbul etdiyi qətnamələrdə də öz əksini tapıb”, – Kobaxidze vurğulayıb.
Onun sözlərinə görə, son dövrlər Gürcüstanda Avropa İttifaqına və Avropa bürokratiyasına inam ciddi şəkildə azalıb. Baş nazir hesab edir ki, bunun əsas səbəbi Avropa strukturlarının Gürcüstanın daxili sabitliyini və qanunun aliliyini təmin etməyə yönəlmiş siyasətə qarşı çıxmasıdır.
“Avropa Parlamentinin artıq yeddi qətnaməsi təsdiqlənib və onların hər biri açıq-aşkar qeyri-obyektivdir. Bu qətnamələr nəinki Gürcüstanın suveren qərarlarına hörmətsizlikdir, eyni zamanda Avropa qurumlarının cəmiyyətdəki nüfuzuna da mənfi təsir göstərir”, – Baş nazir deyib.
Kobaxidze Avropa İttifaqı nümayəndələrinin bəzi hallarda cinayət məsuliyyəti daşıyan şəxslərin azadlığa buraxılmasını tələb etməsini “anlaşılmaz və qəbuledilməz” adlandırıb:
“Bizə ölkəmizdə sabitlik, qanunun aliliyi və əmin-amanlıq lazımdır. Avropa Parlamentinin sənədlərində bu prinsiplərin pozulduğunu görmək təəssüf doğurur. Cəmiyyətimiz bu yanaşmanı qəbul etmir və artıq bunun nəticəsində Avropa strukturlarına olan inam kəskin şəkildə azalıb”.
O əlavə edib ki, Gürcüstanın dövlət maraqlarına qarşı yönəlmiş belə mövqelər ölkədə ictimai etimadı sarsıdır və Avropa İttifaqı ilə münasibətlərə zərər vurur.
