“The Financial Times” yazır ki, Çin ABŞ-ın AMD və Intel prosessorlarının dövlət kompüterlərində və serverlərində istifadəsini qadağan edən təlimatlar tətbiq edib.
Sherg.az xarici mediaya istinadən xəbər verir ki, yeni qaydalar Microsoft Windows və digər xarici baza məhsullarını qadağan etməklə yerli həllərin üstünlüyünü təşviq etmək məqsədi daşıyır.
Bu qaydalar ABŞ və Çin arasında uzun müddətdir davam edən texnologiya müharibəsində ən son addımdır.
Artıq dövlət qurumları AMD və Intel çipləri əvəzinə “etibarlı” yerli ehtiyat hissələrindən istifadə etməlidir.
Siyahıya ABŞ-da qadağan olunmuş Huawei və dövlət tərəfindən dəstəklənən Phytium şirkətinin çipləri də daxil olmaqla 18 təsdiq edilmiş prosessor daxildir.
Dekabr ayında təqdim edilən və bu yaxınlarda sakitcə tətbiq edilən yeni qaydalar Intel və AMD-yə əhəmiyyətli dərəcədə təsir göstərə bilər.
Ötən il Intel-in 54 milyard dollarlıq satışlarının 27 faizi və AMD-nin 23 milyard dollarlıq gəlirinin 15 faizi Çinin payına düşüb. Lakin dövlət və özəl sektorda nə qədər çipdən istifadə edildiyi bəlli deyil.
Bu addımlar Çinin ABŞ istehsalı olan texnologiyanın istifadəsini məhdudlaşdıran ən aqressiv addımdır.
Keçən il Pekin yerli şirkətlərə kritik infrastrukturlarda Micron çiplərindən istifadə etməyi qadağan edib.
Bu arada, ABŞ çip istehsalçılarından tutmuş aerokosmik firmalara qədər çoxsaylı Çin şirkətinə qadağa qoyub.
Bayden administrasiyası həmçinin NVIDIA kimi ABŞ şirkətlərinin Çinə süni intellekt və digər çiplər satmasını əngəlləyib.
