Son illərdə sosial media platformaları insan həyatının ayrılmaz hissəsinə çevrilib.
Bu platformalar arasında xüsusilə TikTok qısa zamanda böyük populyarlıq qazanaraq, yeni nəsil istifadəçilərin ən çox müraciət etdiyi məkanlardan birinə çevrilib.
Hazırda bir çox insan TikTok vasitəsilə həm öz yaradıcılığını ifadə edir, həm də ciddi məbləğdə gəlir əldə etdiyini bildirir.
Həqiqətəndə TikTokdan külli miqdarda pul qazanmaq mümkündürmü?
İnformasiya Texnologiyaları üzrə Mühəndis-Tədqiqatçı, Azərbaycan Kibertəhlükəsizlik Təşkilatları Assosiasiyasının (AKTA) eksperti Bəhruz Əliyev “Sherg.az”a bildirib ki, sosial platformalarda yüksək qazancın reallığı nadir hallarda mümkündür, amma bu hər kəs üçün deyil:
“Sosial platformalarda yüksək gəlir qazanmaq üçün bir neçə əsas faktor var.
Birincisi izləyici sayı – Milyonlarla izləyicisi olan şəxslər sponsorlu reklamlar, canlı yayım hədiyyələri və ya məhsul satışı ilə pul qazana bilərlər. İkincisi aktivlik – Gündəlik paylaşımlar, trendə uyğun kontent və izləyici ilə canlı interaksiyalar.
Üçüncüsü brend əməkdaşlığı – Tanınmış şəxslər brendlərlə əməkdaşlıq edib məhz həmin məhsulları tanıtdıqlarına görə ödəniş alırlar. Dördüncüsü isə canlı yayım hədiyyələri – Məsələn, TikTok istifadəçiləri canlı yayım zamanı "gift" göndərirlər. Bu "virtual hədiyyələr" real pula çevrilə bilər. Amma hər kəs yüksək qazana bilmir. Digər tərəfdən Sosial platformalarda qazanc belə asandırsa, insanlar niyə adi işlərə getdiyi sualı ortaya çıxır. Çünki sosial platformalarda gəlir sabit deyil. Bir gün 100 manat qazandıra bilər, sabah isə 0 manat. Əgər izləyici və bəyənmə yoxdursa, qazanc da olmur. Eyni zamanda daim maraqlı və trendə uyğun kontent yaratmaq çətindir. Həmçinin minlərlə insan Sosial platformalardan pul qazanmaq istəyir. Yalnız fərqlənənlər uğur qazanır. Sosial platformalarda qaydaları dəyişdikcə, baxış və qazanc da azala bilər".
Ekspert əlavə edib ki, müxtəlif ölkələrdə TikTok-un təsiri ilə bağlı narahatlıqlar var və buna görə müəyyən tədbirlər görülür:
"Məsələn, bəzi ölkələrdə TikTok-da yayılmış zərərli və ya mənəvi dəyərlərə uyğun olmayan məzmunlara qarşı məhdudiyyətlər qoyulur. Hətta gəncləri qorumaq üçün yaş senzurası tətbiq olunur və insanlara sosial medianın real həyatla fərqini izah edən maarifləndirici layihələr keçirilir.
Ölkəmiz də daxil olmaqla bir çox ölkədə TikTok-da yayılan zərərli trendlərlə bağlı narahatlıqlar var. Amma düşünürəm ki, konkret qadağa ilə yox, daha çox nəzarət və maarifləndirmə yolu ilə mübarizə aparmaq daha uyğundur. Tiktokda maarifçilik və mədəni tədbirlər hə həyata keçirmək olar və belə məzmunlar da az deyil. Sadəcə trendlər istifadəçilərin marağını əks etdirir”.
