Şanxay Əməkdaşlıq Təşkilatı (ŞƏT) “ŞƏT tərəfdaşı” adlı vahid status yaratmağa qərar verib.
Bu barədə ŞƏT ölkələrinin “Tiencin Bəyannamə”sində qeyd edilib.
Bildirilib ki, üzv dövlətlər “müşahidəçi” və “dialoq tərəfdaşı” statuslarını birləşdirərək “ŞƏT tərəfdaşı” statusunu təsis ediblər.
Şanxay Əməkdaşlıq Təşkilatı 2001-ci ildə yaradılmış beynəlxalq təşkilatdır. Təşkilata Hindistan, İran, Qazaxıstan, Çin, Qırğızıstan, Rusiya, Tacikistan, Pakistan, Özbəkistan və Belarus daxildir. Müşahidəçi ölkələrə Əfqanıstan və Monqolustan, dialoq tərəfdaşlarına isə Azərbaycan, Ermənistan, Bəhreyn, Misir, Kamboca, Qatar, Küveyt, Maldivlər, Myanma, Nepal, Birləşmiş Ərəb Əmirlikləri, Səudiyyə Ərəbistanı, Türkiyə və Şri-Lanka daxildir.
Millət Vəkili Vüqar Bayramov “Sherg.az”a bildirdi ki, Azərbaycan həm beynəlxalq platformalar, həm də ayrı-ayrı dövlətlərlə əlaqələrini genişləndirməkdədir:
“Təbii olaraq, Şanxay Əməkdaşlıq Təşkilatına üzv ölkələrlə də qarşılıqlı əməkdaşlıq mövcuddur. Bəzi ölkələrlə bu əməkdaşlıq strateji tərəfdaşlıq kontekstində həyata keçirilir. Cənab Prezidentin Çinə səfəri zamanı keçirilən görüşlər və müzakirə olunan məsələlər göstərir ki, Şanxay Əməkdaşlıq Təşkilatına üzv olan ölkələrdən Azərbaycan iqtisadiyyatına əhəmiyyətli həcmdə sərmayələrin cəlb edilməsi mümkündür. İnvestisiyaların cəlbi isə praktiki baxımdan Azərbaycan iqtisadiyyatının inkişafı üçün mühüm əhəmiyyət kəsb edir, çünki bu, daha çox sərmayənin daxil olması deməkdir. Gözlənilir ki, həm Şərq İqtisadi Forumu toplantısında iştirak, həm də keçirilən görüşlər nəticə etibarilə Azərbaycan iqtisadiyyatına əlavə sərmayələrin cəlb olunmasına, eyni zamanda üzv ölkələrlə ticarət dövriyyəsinin artmasına şərait yaradacaq. Bu isə Azərbaycan dövləti üçün yeni imkanlar mənasına gəlir”.
