Bu gün Zəfər günüdür. Müzəffər Azərbaycan ordusu işğalçıları ağır məğlubiyyətə uğradaraq özünün əzəli və tarixi torpaqlarından qovmasının ikinci ilini bayram ab-havası ilə qeyd edir.
Sentyabrın 27-dən başlayaraq Azərbaycan Ordusunun həyata keçirdiyi əks hücum əməliyyatları zamanı doğma torpaq, Vətən uğrunda canını fəda edərək şəhidlik zirvəsinə yüksələnlər həm də öz adını xalqın tarixi yaddaşına həkk etdilər. Onlar Vətən, dövlət və xalq qarşısında öz borcunu sonadək ödəyib qəhrəmanlıq nümunəsi yaratdılar, milyonlarla insanın sevgisini, rəğbətini qazandılar.
Xalqımızda və ordumuzda qələbə əminliyi yaradan qazandığımız nailiyyətlərin müəllifi Azərbaycan Prezidenti İlham Əliyevin qətiyyətli mövqeyi, diplomatik uğurları idi.
Ana Vətən Partiyası sədrinin Humanitar və Kommunikasiya Məsələləri üzrə müşaviri, Qadınlar Şurasının sədri Günay Ağamalı da "Şərq" ə açıqlamasında Xilaskar Ali Baş Komandan İlham Əliyevin rəhbərliyi və müzəffər Silahlı Qüvəllərimizin qəhrəmanlığı sayəsində əldə etdiyimiz Zəfər Gününün ölkəmizdə çox böyük bayram əhval ruhiyyəsi yaratdığını deyib. Nə xoş bizə ki, xalqımızın taleyində haqq - ədalətə qovuşmaq, hər il bu böyük qələbənin ildönümünü qeyd etmək də varmış: "30 il erməni faşizminin əsarətində qalan, həsrətində olduğumuz torpaqlarımızı bu gün azad görəndə sevinc göz yaşları, qəhərdən boğulan duyğularımıza hakim ola bilmirik. Bu duyğuları, sevinci qürur və şərəflə bölüşürük.
Vətən müharibəsində Azərbaycanın zəfəri siyasi-hüquqi nəticələrinə görə həm regional, həm də qlobal miqyaslı hadisədir.
44 günlük müharibə ilə cəmiyyət və xalq olaraq göstərə bildik ki, öz torpağımız uğrunda rahatlıqla ölə bilərik. Millətin formalaşması üçün bu çox vacib mənəvi amillərdən biridir. Çünki Vətən torpağı qanla sulandığı təqdirdə Vətən olur.
44 günlük müharibədə qələbə ilə Azərbaycan tək Qarabağın azad olunması ilə məhdud düşünən bir dövlətdən çıxaraq, daha böyük hədəfləri olan bir dövlətə çevrilməyə başlayıb.
Ay yarıma işğal altında olan torpaqları azad etmək, erməni mifini darmadağın etmək güclü Azərbaycan haqqında təsəvvürləri daha da genişləndirib. Bu uğurların qazanılmasında güclü lider və onun yaratdığı güclü ordu xüsusi qeyd olunmalıdır. Müasir silahlarla təchiz olunmuş, yüksək döyüş ruhlu əsgər və zabitlərimizin vətənpərvərlik hissləri qələbəmizi şərtləndirən amillər sırasındadır. Əlbəttə ki, məqsədə doğru inamlı addımlar Azərbaycanın tarixinə Qalib ölkə adını həkk etdi və bu tarixdə görünməyən bir qələbə idi.
Diləyimizi reallığa çevirən Ölkə başçımız, Ali Baş Komandanımız Cənab İlham Əliyevə, ərazi bütövlüyümüz uğrunda canlarından keçən, müqəddəs ruhları andımıza çevrilən qəhrəman Şəhidlərimizə, sağlamlıqlarını itirən qazi qardşalarımıza tarix boyu millətimiz var olduqca minnətdarıq.
Tarixi gün münasibətilə Millətimizi Azad, Qüdrətli, Bütöv Azərbaycana hədəfləyən və bu yolda yorulmadan çalışan qətiyyətli, yenilməz, qəhrəman, XİLASKAR Ali Baş Komandanımız, Möhtərəm Cənab Prezidentimiz İlham Əliyevi, onun ən sadiq silahdaşı Mehriban Xanımı, Müzəffər Ordumuzu, bütövlükdə Azərbaycan Xalqını ürəkdən təbrik edirəm. Qoy Uca Tanrı daim dövlətimizi və xalqımızı pənahında saxlasın. Amin!"
Şəymən
