Dünən Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələri tərəfindən Ağdam rayonunun Əliağalı kəndi istiqamətində yerləşən bölmələri atəşə tutulub.
Müdafiə Nazirliyindən verilən məlumata görə, atəş nəticəsində yol təkmilləşdirmə işlərinə cəlb olunan hərbi qulluqçumuz baş gizir Dadaşov Sakit Əhliman oğlu yaralanıb. Yaralıya ilkin tibbi yardım göstərilib və o, hərbi hospitala təxliyə olunub.
Baş vermiş insidentin araşdırılması üçün Rusiya sülhməramlı qüvvələrinin komandalığına və Türkiyə-Rusiya Birgə Monitorinq Mərkəzinə məlumat verilib.
Məlumdur ki, Ağdam rus sülhməramlılarının nəzarətindədir. Belə olan halda atəşkəsin pozulması ciddi suallar doğurur. Maraqlıdır, rusların baş verənlərdə nə kimi marağı var?
Hadisəni “Sherg.az”a şərh edən millət vəkili Aqil Abbas qeyd edib ki, atəşkəsin pozulması ermənilərin planı deyil:
“Ağdamın atəşə tutulması məhz rus sülhməramlılarının əməlidir. Çünki onlar atəşkəsin pozulmasında daim maraqlıdırlar. Belə hadisələr hələ 3-4 ay davam edəcək”.
