“Avropa İttifaqı Şurasının Prezidentinin təşkilatçılığı ilə Azərbaycan Respublikasının Prezidenti və Ermənistanın Baş naziri arasında bu formatda 14 may tarixli sayca beşinci görüşü iki ölkə arasında normallaşma gündəliyinin irəlilədilməsi baxımından faydalı və nəticəyönümlü hesab edirik”.
Bu barədə Azərbaycan Xarici İşlər Nazirliyinin açıqlamasında bildirilir.
“İlk növbədə, müxtəlif müdaxilə və şərtləndirmə cəhdlərinə görə 9 aya yaxın müddətdə fasilə verilən “Brüssel formatı”nda görüşün yenidən keçirilməsi tərəflər arasında ən yüksək səviyyədə dialoqun təşviqi baxımından əhəmiyyət kəsb edir.
Görüş zamanı Azərbaycan və Ermənistan arasında ikitərəfli sülh sazişi layihəsinin razılaşdırılması, sərhədlərin delimitasiyası və kommunikasiyaların bərpası istiqamətləri üzrə konkret nəticələrin əldə edilməsi məqsədilə ətraflı fikir mübadiləsi aparılıb.
Bu istiqamətdə münasibətlərin normallaşması üçün tərəqqi əldə edilməsinə dəstək verən səyləri alqışlayır, bu məqsədi güdən beynəlxalq tərəfdaşlarla dialoqu və qarşılıqlı fəaliyyəti davam etdirməyə hazır olduğumuzu bir daha təsdiq edirik”, - açıqlamada deyilir.
Görüşü “Sherg.az”a dəyərləndirən millət vəkili Sevil Mikayılova söyləyib ki, Azərbaycan və Ermənistan rəhbərlərinin Brüsseldə sayca beşinci olan görüşü normallaşma prosesi üçün daha faydalı hesab edilə bilər:
“30 il davam edən danışıqlar prosesində Azərbaycan öz prinsipial mövqeyindən geri çəkilmədi və sonda hərbi-siyasi iradə ortaya qoyaraq münaqişəni həll etdi. İkinci Qarabağ müharibəsindən sonra normallaşma prosesində də Azərbaycan kənar müdaxilələrə imkan verməyəcəyini bəyan etmişdi. Növbəti Brüssel görüşündə isə bu, bir daha isbat olundu. Digər tərəfdən ikinci Qarabağ müharibəsindən sonra Azərbaycan 5 əsas prinsip əsasında sülh təklif edib. Lakin xarici qüvvələrin, xüsusilə də Fransanın normallaşma prosesinə pozucu təsiri nəticəsində Azərbaycan-Ermənistan arasındakı Brüssel formatı pozuldu. Yenidən Brüsseldə əvvəlki formata uyğun danışıqların bərpa olunması ilə Azərbaycan eyni zamanda Fransaya da öz siyasi iradəsini göstərdi:
Xanım parlamentari əlavə edib ki, bu gün beynəlxalq birlik tərəfindən də sülhün alternativi olmadığı dərk edilir:
“Yəni Azərbaycan-Ermənistan arasında sülh müqaviləsinin imzalanması üçün danışıqlar yolu dəstəklənilir. Həmçinin görüş zamanı Azərbaycanın təşəbbüsü ilə Zəngəzur dəhlizinin reallaşması ideyası Avropa Birliyi tərəfindən dəstəklənmiş oldu.
Görüşün yekunları ilə bağlı Avropa İttifaqı Şurasının Prezidenti Şarl Mişelin bəyanatına əsaslanaraq demək olar ki, danışıqların istiqaməti və nəticələri faydalı hesab oluna bilər. Xüsusilə saxlanılan şəxslərin azad edilməsi, kommunikasiya əlaqələrinin bərpa olunması ilə bağlı danışıqlar, Azərbaycan və Ermənistan sərhədlərin delimitasiyası üzrə ikitərəfli görüşləri bərpa etmək barədə razılığın əldə olunmasını uğurlu nəticələr hesab etmək olar.
Düşünürük ki, Azərbaycan və Ermənistan arasındakı normallaşma prosesinə kənar müdaxilələr olmazsa və Avropa İttifaqı hazırki formatı dəstəkləyərsə, Ermənistan tərəfindən daha qəti addımların atılmasının şahidi ola bilərik".
