Türkiyənin reytinqli “Bahar” serialının son iki bölümündəki Azərbaycanla bağlı detal diqqət çəkib. Ekran işində məktəb direktoru olan Rza obrazının otağında Xarıbülbül simvolu yer alıb. Belə ki, layihənin ötən iki bölümündə Rzanın fonunda sözügedən simvol göstərilib.
Siyasi şərhçi Azər Həsrət “Sherg.az”a bildirib ki, Qardaş Türkiyənin filmlərində, seriallarında və sənət əsərlərində Azərbaycana müraciət geniş yayılıb:
“Sözügədən platformalarda Azərbaycanlə bağlı mövzulara detallı şəkildə göstərilir. Bu isə iki qardaş xalqın iç-içə olmasından xəbər verir. “Bahar” serialı ilə yanaşı ötən həftə efirə gedən “Kuruluş Osman” serialının da növbəti seriyasında Azərbaycanda hamının sevə-sevə dinlədiyi Zeynəb Xanlarovanın ifasında “Yaşa mənim xalqım!” mahnısına geniş yer verildi. Yəni iki ayrı epizodda həmin mahnı səsləndirildi. Birinci hissədə sadəcə musiqisi səsləndirildi, ikinci epizodda isə musiqisi ilə bərabər sözləri də ifa olundu. Yəni belə elementlər qardaş Türkiyədə tez-tez nəzərə çarpır. Artıq biz elə bir mərhələyə gəlib çatmışıq ki, film, ədəbiyyat, dil və əlifba sahəsində ortaqlaşma başa çatmalıdır. Azərbaycan xalqı da Türkiyə xalqı kimi türk millətidir. Biz iki dövlət, bir millətik. Belə olan halda hər şeyimiz ortaq olmalıdır. Azərbaycan dövlət dilinin türkcə adlandırılmasına qayıtmaq haqqında düşünməlidir. 1918-ci ildə qurulan Azərbaycan Xalq Cumhuriyyətinin dövlət dili həmin vaxtki imkanlar çərçivəsində türkcə elan edilib. Eyni zamanda Rusiyanın nəzarətində olan Dağıstanın da dövlət dili türkcə olub. Təəssüflər olsun ki, Stalinin dövründə türk kimliyi arxa plana keçdi və Azərbaycan dili önə çıxarıldı. Azərbaycan Respubilikası da AXC-nin varisi olduğuna görə dil məsələsində həmin varisliyi təmin etməlidir. Yəni sözügedən filmlərdə əks olunan ayrıntılar bizim üçün çağırış olmalıdır. Necə olur ki, hər iki tərəfin anladığı dil bir ölkədə türkcə, digərində isə Azərbaycan dili adlanır?”.
