Ona görə də ərəb ölkələri Azərbaycanla əlaqələrin inkişafında daha çox maraqlıdır
Prezident İlham Əliyev Ərəb Parlamentinin Prezidenti Adel bin Əbdulrəhman əl-Asumini qəbul edib. Dövlət başçısı Azərbaycanın ərəb ölkələri ilə münasibətlərinin inkişaf etdiyini, özünün ərəb ölkələrinin rəhbərləri ilə çoxsaylı görüşlərinin və qarşılıqlı səfərlərin bunun əyani sübutu olduğunu deyib. Ölkə rəhbəri ötən il Ərəb Liqasının Zirvə Toplantısına dəvət olunmasını əlaqələrimizin yüksək səviyyəsinin göstəricisi kimi dəyərləndirib. Dövlət başçısı ərəb ölkələrinin həm işğal dövründə, həm İkinci Qarabağ müharibəsi zamanı, həm də Zəfərimizdən sonra Azərbaycanla həmrəy olmasını yüksək qiymətləndirib. Ermənistanın Azərbaycana qarşı təcavüzü ilə bağlı İslam Əməkdaşlıq Təşkilatı çərçivəsində də çoxsaylı qətnamələr qəbul olunmasının önəmini qeyd edib. Prezident 30 illik işğal dövründə ermənilərin xalqımıza qarşı mədəni soyqırım törətdiklərini bildirərək, həmin ərazilərdə onların islam maddi-mədəniyyət irsini məhv etdiklərini, 67 məsciddən 65-ni dağıtdıqlarını diqqətə çatdırıb. Prezident həmçinin ölkəmizin islam həmrəyliyini hər zaman dəstəklədiyini bildirib. Bu xüsusda bir müddət əvvəl Fələstində Azərbaycanın diplomatik nümayəndəliyinin açılmasını, Azərbaycanın xarici işlər nazirinin Fələstinə səfərini və orada ölkəmiz tərəfindən məktəbin inşasını qeyd edib. Dövlət başçısı Azərbaycanın İslam Həmrəyliyi Oyunlarına ev sahibliyi etməsini xatırladıb. Ölkəmizin Avropada islamafobiya meyillərinin artmasından narahatlığını ifadə edib. Görüşdə Azərbaycanla islam və ərəb dövlətləri arasında iqtisadiyyat, ticarət, investisiya sahələrində əlaqələrin genişləndirilməsinin vacibliyi diqqətə çatdırılıb. Əməkdaşlığın birgə səylərlə daha da inkişaf edəcəyinə əminlik ifadə olunub.
Ərəb Parlamentinin Azərbaycana qardaş ölkə kimi münasibət bəslədiyini bildirən qonaq Fələstin problemi ilə bağlı göstərilən dəstəyə görə dövlətimizin başçısına minnətdarlığını ifadə edib. Dövlət başçısının Ulu Öndərin layiqli davamçısı olduğunu məmnunluqla qeyd edən qonaq Azərbaycan Prezidentinin müdrik və uzaqgörən siyasəti nəticəsində ölkəmizin qazandığı nailiyyətləri vurğulayıb. O, Azərbaycanın islam dəyərlərinin müdrikliyi əsasında inkişaf edən və bu dəyərlərin hökm sürdüyü bir ölkə olduğunu deyib.
Milli Cəbhə Partiyasının sədr müavini Tural İrfan "Şərq"ə açıqlamasında deyib ki, ərəb ölkələri ilə Azərbaycanın münasibətləri hər zaman normal olub. Analitik qeyd edib ki, əlaqələrin inkişafı bizim üçün maraqlı olmalıdır: "Əlaqələrimizin qənaətbəxş olmamasının, bəzi ərəb ölkələrinin Ermənistan tərəfində durmasının bir neçə səbəbi var. İlk səbəb odur ki, burada təbliğatın rolu böyükdür. Azərbaycan həqiqətlərini istədiyimiz kimi ərəb cəmiyyətlərinə çatdıra bilməmişik. Bəzi ərəb ölkələrinin Ermənistanla sıx əlaqəsi sovet dövrünün təsirindən qalma məsələdir. Sovet dövründə Fələstin, Livan və Suriya ərazisində yaradılan təşkilatlara və oradakı erməni dəstələrinə maliyyə dəstəyi göstərilib. Bu, müəyyən maraqlar naminə həyata keçirilib və nəticədə ərəb ölkələrinin bəziləri ilə ermənilərin əlaqələrinin təməli qoyulub. Ancaq indi durum başqadır. Azərbaycan müstəqil ölkədir və inkişaf yolundadır. Ona görə də ərəb ölkələri Azərbaycanla əlaqələrin inkişafında daha çox maraqlıdır. Ümid edirəm, bu əlaqələr daha intensiv hal alacaq".
