Zəlimxan Məmmədli: "Mən istirahət vaxtlarımı kabab yeməklə keçirmirəm"
"Bulaq inşa etdiyimiz kəndlə heç bir qohumluğum, tanışlığım yoxdur. Azərbaycanın ayağımızı qoyduğumuz hər torpaq qarışı Vətəndir, yurddur"
“Borçalı” İctimai Birliyinin sədri Zəlimxan Məmmədlinin feysbuk profilində paylaşdığı məlumat ictimaiyyətdə maraqla qarşılanıb. Birlik rəhbəri İsmayıllı rayonunda bulaq tikintisini əks etdirən fotoları öz səhifəsində paylaşaraq, gördükləri iş barədə qısa məlumat verib. Z.Məmmədli qeyd edib ki, düzəltdikləri bulaq Hacıhətəmli kəndindən Göyçay çayı istiqamətində Kurdeldarbəyli kəndi səmtində iki dağın arasında yerləşir. Bulağın adı da diqqət çəkib. Birlik sədrinin sözlərinə görə, su çeşməsi məxsusi olaraq “Bəy bulağı” adlandırılıb.
Daha ətraflı məlumat almaq üçün hazırda İsmayıllıda olan “Borçalı” İctimai Birliyinin sədri Zəlimxan Məmmədli ilə əlaqə saxladıq. O, bulağın tamamlanma mərhələsində olduğunu və sentyabrın 1-də açılışının ediləcəyini söylədi. Z.Məmmədli ötən il belə bir bulağın tikilməsi ilə bağlı söz verdiyini dedi:
“Sabah, yəni bulağın açılışında daha ətraflı məlumat verəcəyik. Keçən il söz vermişdim. Türk əxlaqında söz vermək dindən, imandandır. Əgər söz verdinsə, ya yerinə yetirməlisən, ya da sözünü geri götürməlisən. Ötən ilin avqust ayında, mərhum Əbülfəz Elçibəyin haqq dünyasına qovuşduğu günə az qalmış verilmiş sözümüz var idi. Bura köhnə, baxımsız bulaq yeriydi. Qərara gəldik ki, yeni bulaq inşa edək. Sözümüz havada qalmadı və reallaşması üçün əlimizdən gələni etdik. İndi bulağın yekunlaşma işlərini görürük. Sentyabrın 1-də açılışını edəcəyik. Açılış da simvolik olacaq, hay-küy yaratmaq niyyətimiz yoxdur.
Sadəcə öz ətrafımız, yaxınlarımız, dost-tanışın iştirakı ilə 5-10 dəqiqəlik açılış mərasimi təşkil ediləcək. Niyə “Bəy bulağı”nı tikdik, Azərbaycan insanının gücü-qüdrəti hara qədərdir və bu gücdən istifadə olunurmu? Gələcək Azərbaycanın inşa olunması millətinmi, yoxsa yadların boynundadır? Açılışda bunlarla bağlı mesajlarımızı verəcəyik. Biz xeyir iş görürük. Bulağı, bayrağı, adını görənlərin sevincini, qürurunu açıq-aşkar görürük”.
Z.Məmmədli qeyd edib ki, “Bəy bulağı”nın özü bir əzəmətdir:
“Biz bəyliyimizə, özümüzə qayıtmalıyıq. Bu əməlimiz də özünüdərkdir. Vətəndaş təşəbbüskarlığının motivasiyasıdır. Heç kimin sağolunu, minnətini istəmirik. Növbəti ildə daha bir bulaq inşa edəcəyik. Mən istirahət vaxtlarımı kabab yeməklə keçirmirəm. Həmişə yaradıcılıqla, nələrsə etməklə vaxtımı keçirirəm. Bu da onlardan biridir. Bulaq inşa etdiyimiz kəndlə heç bir qohumluğum, tanışlığım yoxdur. Azərbaycanın ayağımızı qoyduğumuz hər torpaq qarışı Vətəndir, yurddur. Sevilməli və qulluq görməlidir. Bizim işimizin də fəlsəfəsi budur. Usta Amilin rəhbərliyi ilə bulağı mən, ailəm, nəvəm Aqil, dostum inşa etmişik və gözəl də bir iş ərsəyə gəlib. Onu da deyim ki, bulağın suyu möhtəşəmdir.
Həkim kimi bunu deyirəm. Xarab olan sular insana köp verir, narahat edir, digər fəsadları olur. Amma bu bulağın suyu çox gözəl və rahatdır. Bu sudan dadan əl çəkməyəcək. Samovarımız da yanımızdadır, hərdən çay dəmləyirik”.
