Mütəxəssislərin hazırladıqları peyvənd təhlükəsizlik, effektivlik və keyfiyyət parametrləri üzrə təsdiq olunub
Çin hakimiyyəti yeni tip koronovirusun (COVID-2019) səbəb olduğu xəstəliyə qarşı ilk peyvəndin klinik sınaqlarına icazə verib.
AZƏRTAC bu barədə Çinin Mərkəzi televiziyasına istinadla xəbər verir. “Dünən yerli vaxtla saat 20:18-də akademik Çen Veyin rəhbərlik etdiyi tədqiqatçılar qrupu klinik sınaqlara icazə alıb”, - telekanalın məlumatında belə deyilir.
Peyvəndi Çin Hərbi Tibb Elmləri Akademiyasının aparıcı biomühəndisi, general-mayor Çen Veyin rəhbərlik etdiyi qrup hazırlayıb. Qrup koronavirus infeksiyası yayılmağa başladığı günlərdə virusun episentri olan Uxan şəhərinə ezam olunaraq, peyvəndin hazırlanması istiqamətində işə başlamışdı.
Çinli mütəxəssislərin hazırladıqları peyvənd təhlükəsizlik, effektivlik və keyfiyyət parametrləri üzrə təsdiq olunub. Bundan başqa, vaksinin kütləvi istehsalı üçün ilkin hazırlıq işləri də başa çatdırıb.
Son məlumatlara görə, Çində koronovirusa yoluxanların sayı 81 min 117 nəfərə, ölənlərin sayı isə 3 min 231 nəfərə çatıb.
Çin Dövlət Səhiyyə Komitəsinin məlumatına əsasən, ötən sutka ərzində ölkədə 21 yoluxma və 13 ölüm faktı qeydə alınıb. Ölüm hallarının 12-si virusun episentri olan Hubey əyalətində baş verib. Həmçinin indiyədək xəstəlikdən 68 min 679 nəfər sağalıb, 2 min 830 xəstənin vəziyyəti isə ağırdır.
