“Hadisə olub, söyüşüb, ya da dalaşıb. Onun üstə adama 2 il iş verərlər?!”
“Milli Məclislin yüngülləşdirici hallarla bağlı qanunu var. Onu tətbiq etməli idilər”
Millət vəkili Aqil Abbas həbs olunan aktyor Rza Rzayevi sosial şəbəkələrdə müdafiə edənlərə irad bildirənləri qınayıb.
Bu barədə deputat “Sherg.az”a danışıb. O bildirib ki, Rzanı bəzi trol dəstələrı tənqid edir:
“Onu tənqid edənlər ya onu tanımırlar, ya da tanıyıb qəsdən irad bildirirlər. Trol dəstələri var. Onun haqqında yaxşı danışanlar isə jurnalistlər, ziyalılar, tanınmış adamlardır ki, trolluq etmirlər. Öz imzaları ilə yazırlar. Amma dəstələr mövcuddur ki, deyir, nə olsun filankəsdir.
Nə olsun nədir? O, xaricdə kinorejissorluq üzrə təhsil alıb. Ssenaristdir. Bu adam evini satıb, “Geyinilməmiş ayaqqabılar” - Qarabağa, müharibəyə həsr olunmuş ən gözəl filmi çəkib.
Belə saf ürəkli, millətçi, dövlətçi oğlandır. Boy-buxununa fikir verməyin, ürəyi uşaq ürəyi kimi təmizdir.
Hadisə olub, söyüşüb, ya da dalaşıb. Onun üstə adama 2 il iş verərlər?! Özü də hadisədən beş il keçəndən sonra. Vaxtında həbs edilsə, indi türmədən çıxmışdı.
Beş ildə dünya dəyişib. Məsələn, Amerikanın prezidenti, Almaniya konsleri dəyişib, Azərbaycan qələbə qazanıb, Şuşaya bayraq sancıb.
Əsəbiləşdiriblər, affekt vəziyyətinə düşüb, lap bir şillə vurub, sonra? Buna görə 2 il iş düşmür. Milli Məclislin yüngülləşdirici hallarla bağlı qanunu var. Onu tətbiq etməli idilər”.
Xatırladaq ki, Rza Rzayev millət vəkili Aqil Abbasın romanı və ssenarisi əsasında çəkilmiş “Dolu” filmində rol aldığı “Drakon” obrazı ilə məşhurlaşıb.
