Ermənistanın xarici işlər naziri Ararat Mirzoyanın Braziliyanın “Folha” qəzetinə müsahibəsi zamanı guya indiyə qədər əvvəlki COP iclaslarında “Qlobal Cənubun” və inkişaf etməkdə olan ölkələrin ehtiyaclarına az diqqət ayrıldığı barədə iddiaları tamamilə əsassızdır.
Bu fikir Azərbaycanın Xarici İşlər Nazirliyinin Ermənistan xarici işlər nazirinin Braziliyanın “Folha” qəzetinə müsahibəsində COP-la bağlı səsləndirdiyi fikirlərə dair şərhində yer alıb.
Görünür ki, Ermənistan xarici işlər naziri COP çərçivəsində aparılan iqlim danışıqlarından ümumiyyətlə xəbərsizdir.
İndiyə qədər bütün COP-larda iqlim dəyişikliyi ilə mübarizə sahəsində “Qlobal Cənub” üçün əlamətdar qərarlar qəbul edildiyi məlumdur.
Bu baxımdan, Ermənistan xarici işlər nazirinin səsləndirdiyi fikirlər yalnız COP29-un deyil, ondan əvvəlki bütün COP-ların da ev sahiblərinə hörmətsizlikdir.
Politoloq Əhəd Məmmədli "Sherg.az"a bildirib ki, Ermənistan COP29-un Azərbaycanda keçirilməsinə qarşı açıq şəkildə qısqanclıq nümayiş etdirir:
"Bu ölkə tədbirin əhəmiyyətini və mahiyyətini azaltmağa, onun miqyasını kiçiltməyə çalışır. Sülh danışıqları mərhələsində olmağımıza baxmayaraq, rəsmi İrəvan Azərbaycana qarşı təbliğat aparmaqda davam edir. Əgər COP29 tədbiri Gürcüstanda keçirilsəydi, Ermənistanın xarici işlər naziri Ararat Mirzoyan yenə də eyni mövqedən çıxış edərdimi? Bu sual açıq qalsa da, baş verənlər bir daha göstərir ki, Ermənistan hakimiyyəti qeyri-sabit və ardıcıl siyasət yürütmək qabiliyyətindən məhrumdur. Digər tərəfdən, Rəsmi Bakı sülh sazişinin imzalanması məsələsində tələsməməlidir. Əgər Ermənistanla aparılan danışıqlarda Azərbaycanın əsas tələbləri tam şəkildə təmin olunmazsa və istədiyimiz şərtlərlə razılaşdırılmasa, imzalanacaq sülh sazişi uzunmüddətli olmayacaq və yeni problemlərin yaranmasına zəmin yaradacaq. Buna görə də Azərbaycan strateji səbir nümayiş etdirməli və sülh prosesinə yalnız öz milli maraqlarına tam uyğun şəkildə yanaşmalıdır".
