"Ermənistanın baş naziri Nikol Paşinyan Ali Avrasiya İqtisadi Şurasının toplantısına ilk dəfə qonaq qismində dəvət alan Azərbaycan Prezidenti İlham Əliyevlə erməni ictimai rəyinə hesablanmış polemika açarkən, növbəti dəfə kobud bir yalana və birbaşa Putinə hörmətsizliklə ifadə olunan siyasi təxribata əl atdı".
"Sherg.az"ın xəbərinə görə, bu barədə politoloq Elxan Şükürlü deyib.
Ekspert bildirib ki, dövlət başçısı İlham Əliyevin “Azərbaycan Zəngəzur dəhlizinin yaradılması təşbbüsünü irəli sürüb və bu təşəbbüs Rusiya tərəfindən dəstəklənir” fikrinə cavabında Paşinyan üzünü Putinə tutaraq, iddia etdi ki, guya, o, Rusiyanın Zəngəzur dəhlizinin açılmasını dəstəklədiyi fikrini ilk dəfə eşidir:
"Halbuki Paşinyanın ən etibarlı kadrlarından biri - Ermənistan Təhlükəsizlik Şurasının katibi Armen Qriqoryan 2022-ci ilin dekabrında açıq şəkildə bəyan etmişdi ki, strateji müttəfiqləri Rusiya rəsmi İrəvana öz ərazilərindən Azərbaycana dəhliz verilməsi və Ermənistanın Rusiya-Belarus İttifaq Dövlətinə qoşulması üçün onlara ciddi təzyiq göstərir. Anlaşılan odur ki, Qarabağdakı rüsvayçı məğlubiyyətini indiyədək erməni ictimai rəyində Rusiyanın onları müdafiə etməməsi arqumenti üzərində quran Paşinyan hökuməti Zəngəzur dəhlizinin açılması işinin də məhz Rusiyanın təzyiqiylə baş verdiyi fikrini qabartmaqda, Ermənistanda anti-Rusiya əhval-ruhiyyəsini gücləndirməkdə və beləliklə də, KTMT-dən uzaqlaşmaq siyasətindəki ənənəvi tezisi yenidən aktuallaşdırmaqda maraqlıdır. Putin isə hələ də səbrlə Paşinyanın bu şıltaqlıqlarına dözməyə üstünlük verir".
E.Şükürlü əlavə edib ki, Moskvada razılaşdırılıb ki, yolların açılmasında “tənzimlənməmiş məsələləri həll etmək üçün” hər üç ölkənin baş nazirlərinin müavinləri 1 həftə sonra yenidən görüşsünlər:
"Rusiya Baş nazirinin müavini Overçuk isə deyib ki, onlar həmin görüşdə Azərbaycanla Ermənistan sərhədində sərhəd və gömrük nəzarətinin necə aparılacağını müəyyənləşdirəcəklər. Bir həftə sonra – iyunun 1-də isə ölkə başçısı İlham Əliyev və Paşinyanın Avropa Siyasi Birliyinin Kişinyovda keçiriləcək toplantısında da görüşlərinin təşkili planlaşdırılır".
